Header Ads

  • Baru Nyadi

    Isu rayat Sarawak ditan di Kemboja dilempai ba Perintah Malaysia

    Kepala Menteri, Datuk Patinggi Abang Johari Tun Openg.

    MIRI: Perintah nengeri berunding nganjung pengari ke Kemboja ngambi mudah agi berandau ngelepaska 44 peranak Sarawak ti diatu ditan ba sebuah Rumah Jil Pelilih Menua di Kemboja.

    Kepala Menteri Datuk Patinggi Abang Johari Tun Openg madah, Sarawak seruran berandau enggau pengari Opis Luar Malaysia di Kuching pasal isu ngetan enggau ngemeranka atur besundang.

    “Kitai dipadah pasal 44 peranak Sarawak ditan raban bekuasa Kemboja, tang kitai netapka penemu ngemendarka randau Perintah Malaysia enggau Kemboja deka diatur enggau nadai ngena publisiti,” ku iya.

    “Berindik ari randau benung diatur, kitai enda ulih meri penerang silik agi pasal pekara tu laban nangi deka meri penerang ti salah,” ku iya madah ngagai Utusan Borneo pengudah ngabang ngagai pengerami ngelalu pengabang nyerumba Taun Baru China (TBC) ba rumah Menteri Muda Dagang Temuai, Seni enggau Main Asal, Datuk Lee Kim Shin ba Miri kemari.

    Abang Johari mega ngelalau rayat Sarawak bejejimat nerima pengawa puang ti begaji besai dikena nyeliahka sida ditipu raban ti ngereja pengawa belalai ba menua luar.

    “Kitai nerima penerang tumu ari Opis Menteri Luar lalu nyerah ngagai sida laban pekara tu ari baruh kuasa opis menteri nya.”

    “Pesan aku nuju rayat Sarawak, anang alah tipu ejensi pelesu ti ngambi gawa ba menua luar. Sida patut ngenukuka pengamat kereja nya sebedau kin,” ku iya.

    Bela bisi ngabang bini iya, Datuk Amar Juma’ani Tun Tuanku Bujang, Sapit Kepala Menteri Datuk Amar Douglas Uggah Embas, Presiden Parti Sa’ati Rayat Sarawak (SUPP) enggau Menteri Pengawa Berumah enggau Kaunsil Kandang Menua, Datuk Dr Sim Kui Hian, Menteri Muda Elekterik Menua Pesisir Datuk Dr Abdul Rahman Junaidi  enggau Menteri Muda Kaunsil Kandang Menua Dr Penguang Manggil.

    Ku Dr Sim, SUPP deka naka ulih mantu ngelepaska rayat Sarawak ti ditan ba Kemboja kenyau ari taun nyin tadi.

    “Parti deka berandau ngena chara formsl enggau enda formal ngambi berandauka pekara tu. Naka diatu, kitai enda ulih madah silik tang parti deka naka ulih ngatur,” ku Dr Sim.

    Berebak enggau nya, ari semua 44 rayat Sarawak ti ditan, urung 10 indu iku biak ti beumur entara 18 ngagai 20 taun. #BorneoPost

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads