Siku lelaki bebadi nya pengudah treler ke ditepan iya tepawah
Cari Berita

Advertisement

Siku lelaki bebadi nya pengudah treler ke ditepan iya tepawah

Chief Editor | Berita Iban MY
February 15, 2019

Raban bomba benung bejalaika operasyen ba palan eksiden ke nyadi.

SABAH: Siku lelaki bebadi nyawa ketegal tinggang kayu pengudah treler ke ditepan iya tepawah enggau labuh ke arung penalam 35 meter di Jalai Bukit Layang-Layang, Tenom, malam tadi.

Eksiden nyadi urung jam 8.10 malam nya, lelaki nya (mansa) dikelala ngena nama Dominic, 30, diripotka bebadi nyawa ba palan eksiden ke nyadi ketegal balat bakal. 

Pengari Operasyen (PGO) Jabatan Bomba enggau Penyelamat Malaysia (JBPM) Sabah, madahka raban bomba bisi nerima kangau urung jam 8.28 malam bekaul enggau eksiden ke nyadi.

Berindik ari nya, seraban bomba ari Balai Bomba enggau Penyelamat (BBP) Tenom berumban ngesah ke palan eksiden ke nyadi.

“Lebuh datai ba palan eksiden ke nyadi, ketuai operasyen bomba ngeripotka sebuah treler ngundan kayu balak dipechayaka tepawah lalu ngejung ke tama ke arung penalam 35 meter. 

Bisi siku lelaki (mansa) kena tinggang kayu ke diundan treler nya.

“Raban bomba numbak tanah kena ngaga jalai ngemansutka 'mansa' ke ditinggang kayu nya,” ku iya lebuh ke dirandau pengarang berita.

Ku iya, tubuh 'mansa' pengudah nya disuaka ngagai raban polis ngambika ulih bejalaika pengawa silik agi.

“Operasyen tembu urung jam 12.35 tengah malam,” tandu iya.