Siku orang tuai kena lantak kerita Honda CRV di KM48, Jalai Kuching-Serian
Cari Berita

Advertisement

Siku orang tuai kena lantak kerita Honda CRV di KM48, Jalai Kuching-Serian

Chief Editor | Berita Iban MY
February 20, 2019

BA PALAN EKSIDEN KE NYADI: Kerita Honda CRV ke diripotka ngelantak orang tuai nya.

SERIAN: Pengerami 'Chap Goh Mei' ti deka diintu begulai enggau diri sebilik bebali nyadi hari ti chukup ngenyinuka ati, pengudah siku lelaki (orang tuai) diripotka kena lantak kerita Honda CRV di KM48, Jalai Kuching-Serian, lemai kemari.

Penusah ke enda disadang nya nyadi urung jam 2.10 lemai nya, lelaki nya (mansa), Then Sin Choy, 67 taun, diripotka udah nadai ba palan eksiden ke nyadi. 

Ketuai Opis Tasat enggau Penguasa Trafik Sarawak, Supt Alexson Naga Chabu, madah sebedau eksiden nyadi, kerita Honda CRV ke ditepan siku lelaki, 36 taun, benung dirantau jalai ari muak ke Kuching nuju ke Serian.

Tang taja pia, ku iya, lebuh datai ba palan eksiden ke nyadi, lelaki nya (mansa) diripotka enda mukai-mukai ngelayang jalai enggau kena lantak kerita nya.

“Berindik ari eksiden nya, lelaki nya (mansa) diripotka tepelanting enggau ngejung ke iya balat bakal ba pala enggau kaki sepiak kanan. 

“Raban perubat ke bisi datai dia madahka iya (mansa) udah enda ulih diselamatka agi tauka udah nadai ba palan eksiden ke nyadi,” ku iya lebuh ke dirandau pengarang berita lemai kemari.

Alexson ngelansa, deriba kerita Honda CRV nya diripotka selamat tauka nadai bakal ba sebarang alai endur tubuh.

“Bangkai iya (mansa) udah dianjung ke Sepital Serian ngambika ulih bejalaika pengawa silik agi.

“Kes nya dipansik ari baruh 'Seksyen 41 (1) Akta Pengangkutan Jalan 1987',” ku iya.