UDAH TEMU: Siku pelajar ke dipechayaka lemas di Sungai Kanowit
Cari Berita

Advertisement

UDAH TEMU: Siku pelajar ke dipechayaka lemas di Sungai Kanowit

Chief Editor | Berita Iban MY
February 26, 2019

KASIH AMAI: Raban Bomba ngatung bangkai Carlos (gambar mit segala) sebedau dianjung ke Sepital Kanowit.

KANOWIT: Bangkai siku pelajar Sekolah Menengah Kebangsaan (SMK) Kanowit ke dipechayaka lemas lebuh iya nguji nyelamatka bakih iya ke nepan perau ba Sungai Kanowit, udah temu sehari tu tadi.

Ketuai Balai Bomba enggau Penyelamat (BBP) Kanowit, Arrahaman Chik, madahka pelajar nya dikelala ngena nama Carlos Paae, 15 taun, mega siku ari raban Kadet Bomba ditemu raban SAR melepu di Nanga Engkeriring, urung jam 8.10 pagi tadi.

"Raban SAR ngeripotka bisi tetemuka bangkai orang nadai bebaju semina ngena tanchut aja urung penyauh 15 kilometer ari 'Pos Kawalan Bomba' ba Rh Tony, urung jam 8.10 pagi," ku iya lebuh ke dirandau pengarang berita sehari tu tadi.

Ku iya, bangkai pelajar nya dibaie ke jeti Rh Tony sebedau disuaka ngagai raban polis ngambika ulih bejalaika pengawa silik agi.

Ku iya, apai indai pelajar nya mega bisi dikangau ke Sepital Kanowit ngambika meresa tauka ngelala bangkai orang ke ditemu nya.

Nangkan ke nya, seduai iya (apai enggau indai pelajar) orang ke ngempu bangkai nya ianya anak seduai iya.

Kelimpah ari nya, Pengari Ketuai Polis Pampang Kanowit, ASP Faizal Nawi, madahka bangkai pelajar nya udah temu enggau operasyen SAR diketuka ba Hari Ke-Tiga pengudah pelajar nya ditemu.

"Operasyen SAR dikemesaika agi urung tiga nyentuk ke empat Kilometer ke ili sungai ba Hari Ke-Tiga bepun ari jam 7.00 pagi tadi, diuluka polis, bomba enggau APM (Angkatan Pertahanan Awam Malaysia) enggau dibantu orang mayuh ke bisi ngesah ba Sungai Kanowit," ku iya lebuh ke dirandau pengarang berita, sehari tu tadi.

Urung jam 2.00 lemai Hari Minggu tu tadi, pelajar nya enggau siku agi bakih iya deka nyelamatka tiga iku bakih iya ti anyut dalam perau laban enda nemu bekayuh.

Lebuh penusah nyadi, seduai iya benung ba tebing sungai enggau nguji nyemerai ngagai perau ke ditepan tiga bakih iya tang enda mukai-mukai Carlos (mansa) tengelam dibai arus ai. Tang taja pia, bakih iya mujur nyemerai datai ba tebing.

Tiga bakih iya ke nepan perahu nya pengudah nya diselamatka genturung pendiau ke bisi mansak ba palan penusah ke nyadi.