12 March 2019 - Hari Dua ba Minggu Keterubah Musim Lent
Cari Berita

Advertisement

12 March 2019 - Hari Dua ba Minggu Keterubah Musim Lent

Staf @beritaibanMY
March 12, 2019

 “Lebuh kita besampi, anang besebutka mayuh macham leka jaku ti nadai reti baka orang bansa bukai, ke ngumbai sampi sida didinga  laban sampi sida panjai. Anang baka nya, laban Apai kita nemu utai ti dipeguna kita sebedau kita minta ari Iya.

Bacha Ke Satu: Isaiah 55: 10 - 11

Ku TUHAN bejaku: Leka jaku Aku baka seleju enggau ujan ti labuh ari langit lalu meri ai ngagai dunya. Sida ngasuh utai ti ditanam tumbuh lalu mansutka benih ngambika bisi ditanam, enggau pemakai ngambika bisi diempa.

Baka nya meh jaku ti pansut ari mulut Aku. Iya tetap deka mujur ngereja utai ti udah diperambu Aku ke iya. Iya deka ngereja utai ti diasuh Aku kereja iya.

Masmur Entara: Masmur 34: 3 - 4, 5 - 6, 15 - 16, 17 - 18

Saut (peda 17b): Allah Taala ngelepaska orang ti lurus ari semua penusah sida.

Ke Satu
Aram kitai nusui pemesai kuasa TUHAN.
Aram kitai sama sereta muji nama Iya!
Aku besampi ngagai TUHAN, lalu Iya nyaut aku.
Iya ngelepaska aku ari semua penakut aku.

Saut: Allah Taala ngelepaska orang ti lurus ari semua penusah sida.

Ke Dua
Orang ke kena tekan engkadah ngagai Iya, lalu gaga ati.
Sida enda asa ngapa.
Orang ke seranta ngangauka Iya, lalu Iya nyaut.
Iya ngelepaska sida ari semua penusah sida.

SautAllah Taala ngelepaska orang ti lurus ari semua penusah sida.

Ke Tiga
TUHAN ngemataka orang ke lurus
lalu mendingka sabak sida.
Tang Iya ngelaban orang ke ngereja penyai,
ngambika lebuh sida mati, sida enda dikingatka agi.

SautAllah Taala ngelepaska orang ti lurus ari semua penusah sida.

Ke Empat
Orang ke lurus ngangauka TUHAN, lalu TUHAN ninga,
lalu Iya ngelepaska sida ari semua penusah sida.
TUHAN diau semak orang ke tusah ati
lalu ngidupka sida ke nadai agi pengadang.

SautAllah Taala ngelepaska orang ti lurus ari semua penusah sida.

Aklamasi sebedau Injil (peda Matthew 4: 4B):

Mensia enda ulih idup makai roti aja,
tang beridup ba genap leka jaku ti pansut ari mulut Allah Taala.

Bacha Injil: Matthew 6: 7 - 15

Ku Jesus bejaku ngagai murid Iya: “Lebuh kita besampi, anang besebutka mayuh macham leka jaku ti nadai reti baka orang bansa bukai, ke ngumbai sampi sida didinga  laban sampi sida panjai.

Anang baka nya, laban Apai kita nemu utai ti dipeguna kita sebedau kita minta ari Iya.

Nya alai, baka tu ku chara kita patut besampi:

‘Apai kami ti di serega:
Kudus meh nama Nuan.
Datai meh Perintah Nuan.
Nyadi meh peneka Nuan di dunya enggau di serega.
Beri ngagai kami sehari tu pemakai umbas dipakai kami.
Ampun kami penyalah kami, baka kami ke ngampun orang ke salah enggau kami.
Lalu anang mai kami ngagai penguji, tang lepaska kami ari penyai.

“Laban enti kita ngampun orang ke salah enggau kita, Apai kita ti di serega deka mega ngampun penyalah kita.

Tang enti kita enggai ngampun orang ke salah enggau kita, Apai kita pen enggai mega ngampun penyalah kita.”