16 March 2019 - Hari Enam ba Minggu Keterubah Musim Lent - Berita Iban Online | Laman Web Berita Kitai

Header Ads

  • Baru Nyadi

    16 March 2019 - Hari Enam ba Minggu Keterubah Musim Lent

    Ku Jesus bejaku ngagai murid Iya: “Kita udah ninga pasal jaku ti udah disebut, ‘Rinduka pangan kita, lalu begedika munsuh kita.’

    Bacha Ke Satu: Ulang Adat 26: 16 - 19

    Ku Moses bejaku ngagai orang mayuh: “Sehari tu TUHAN Allah Taala kita bejaku ngasuh kita ngasika semua adat Iya. Nya alai, kita enda tau enda tetap ati ngasika semua adat nya enggau pengabis ati, enggau pengabis semengat kita.

    Sehari tu kita udah ngaku TUHAN nyadika Allah Taala kita. Kita udah besemaya deka ngasika Iya, nitihka semua adat Iya, lalu ngereja semua utai ti dipesanka Iya ngagai kita.

    Sehari tu TUHAN udah nyambut kita nyadika nembiak Iya, munyi ti udah disemaya Iya ngagai kita, lalu Iya ngasuh kita ngasika semua adat Iya.

    Iya deka ngaga kita nyadi bansa ti kering agi ari semua bansa bukai ti udah digaga Iya, lalu kita deka mai puji enggau basa ngagai nama Iya, lalu kita deka nyadi nembiak Iya, munyi ti udah disemaya Iya.”

    Masmur Entara: Masmur 119: 1 - 2, 4 - 5, 7 - 8

    Saut (peda 1b): Beberekat meh orang ke ngasika adat TUHAN.

    Ke Satu
    Beberekat meh orang ke nadai ngereja penyalah,
    ke ngasika adat TUHAN.
    Beberekat meh orang ke nitihka adat TUHAN,
    ke ngiga Iya enggau pengabis ati sida.

    SautBeberekat meh orang ke ngasika adat TUHAN.

    Ke Dua
    Nuan, O TUHAN, udah meri ngagai kami adat Nuan
    lalu udah ngasuh kami tetap ati ngasika adat nya.
    Aku ngarapka diri ulih tetap ati
    nitihka semua atur Nuan!

    SautBeberekat meh orang ke ngasika adat TUHAN.

    Ke Tiga
    Aku deka muji Nuan enggau ati ti tuchi,
    lebuh aku belajarka adat Nuan ti lurus.
    Aku deka ngasika adat Nuan.
    Anang ninggalka aku!

    SautBeberekat meh orang ke ngasika adat TUHAN.

    Aklamasi sebedau Injil (peda 2 Korint 6: 2B):

    Dinga kita! Tu meh maya ti patut.
    Tu meh hari pengelepas.

    Bacha Injil: Matthew 5: 43 - 48

    Ku Jesus bejaku ngagai murid Iya: “Kita udah ninga pasal jaku ti udah disebut, ‘Rinduka pangan kita, lalu begedika munsuh kita.’

    Tang Aku madah ngagai kita: rinduka munsuh kita, lalu besampika orang ke merinsaka kita, ngambika kita nyadi anak Apai kita ti di serega, laban Iya ngasuh mata panas manchar ngagai orang ke jai enggau ngagai orang ke manah, lalu ngasuh hari ujan ke orang ke lurus enggau ke orang ke jai.

    Enti kita semina rinduka orang ke rinduka kita, nama upah kita? Indah sida pengumpul chukai deh nemu ngereja nya.

    Lalu enti kita semina nabi pangan kita, baka ni ku nya tau lebih ari utai ti dikereja orang bansa bukai? Indah orang bansa bukai deh nemu ngereja nya.

    Nya alai kita enda tau enda nyadi pemadu badas, baka Apai kita ti di serega.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads