19 March 2019 - Hari Dua ba Minggu Kedua Musim Lent
Cari Berita

Advertisement

19 March 2019 - Hari Dua ba Minggu Kedua Musim Lent

Frankie John™
March 19, 2019

Tang lebuh Josep benung berundingka nya, siku melikat Tuhan pegari di mua iya dalam mimpi, lalu bejaku, “Josep, anak David, anang takut ngambi Maria nyadika bini nuan, laban iya betubuh-bisi ulih kuasa Roh Kudus.

Bacha Ke Satu: 2 Samuel 7: 4 - 5A, 12 - 14A, 16

Tang malam nya TUHAN bejaku ngagai Natan,

“Alai nuan mansang ngagai nembiak Aku David,

‘Lebuh nuan mati, lalu dikuburka begulai enggau bala aki ini nuan, Aku deka ngasuh siku ari bala anak lelaki nuan nyadi raja, lalu ngaga perintah iya kering.

Iya nya meh orang ke deka ngaga rumah ke Aku, lalu Aku deka netapka perintah iya meruan belama iya.

Aku deka nyadi Apai iya, lalu iya deka nyadi anak Aku.

Nuan endang deka meruan bisi peturun, lalu Aku deka ngasuh perintah nuan meruan belama iya. Perintah nuan enda nemu abis.’”

Masmur Entara: Masmur 89: 1 - 2, 3 - 4, 26 & 28

Saut (peda 36): Anak David deka idup belama iya.

Ke Satu
O TUHAN, aku deka seruran belagu ngenang pengerindu Nuan ti meruan belama iya.
Aku deka madahka penetap ati Nuan belama iya.
Aku nemu pengerindu Nuan deka meruan belama iya,
lalu penetap ati Nuan deka meruan baka langit.

SautAnak David deka idup belama iya.

Ke Dua
Ku Nuan, “Aku udah ngaga sempekat enggau siku orang ke udah dipilih Aku.
Aku udah besemaya enggau nembiak Aku David,
‘Peturun nuan deka betampung nyadi raja.
Aku deka ngasuh perintah nuan tan belama iya.’”

SautAnak David deka idup belama iya.

Ke Tiga
Iya deka nyebut ngagai aku, ‘Nuan Apai enggau Allah Taala aku.
Nuan Penyaga enggau Juruselamat aku.’
Aku deka seruran ngamatka semaya Aku enggau iya,
lalu sempekat Aku enggau iya deka meruan belama iya.

SautAnak David deka idup belama iya.

Bacha Ke Dua: Rome 4: 13, 16 - 18, 22

Menyadi: Laban semaya ti madahka Abraham deka bempu dunya ukai datai ngagai iya tauka ngagai peturun iya ulih Adat, tang ulih pengelurus ti datai ulih pengarap.

Nya alai semaya nya bepanggai ba pengarap, ngambika semaya nya beduduk ba pengasih lalu dijamin deka diberi ngagai semua peturun Abraham,

ukai semina ngagai orang ke nitihka Adat, tang mega ngagai orang ke bisi pengarap baka enggi Abraham, laban iya apai semua kitai,

munyi ti udah ditulis, “Aku udah ngaga nuan nyadi apai ke mayuh bengkah bansa.”

Nya meh jalai Allah Taala ti dikarapka Abraham ngaga semaya Iya enggau Abraham.

Iya nya meh Allah Taala ke ngangkatka orang ari mati, ke ngasuh semua utai ti nadai, nyadi bisi.

Abraham arap lalu andal ati, lalu iya nyadi Apai ke mayuh bengkah bansa, munyi ti udah dadahka ngagai iya, “Baka nya meh pemayuh peturun nuan.”

Nya alai ketegal pengarap iya, “Abraham dikumbai lurus.”

Aklamasi sebedau Injil (peda Masmur 84: 4):

Beberekat meh orang ke diau dalam Rumah Nuan, O TUHAN;
ke seruran belagu muji Nuan.

Bacha Injil: Matthew 1: 16, 18 - 21, 24

Jakop nya apai Josep, ke jadi enggau Maria, indai Jesus ke dikumbai Kristus.

Baka tu ku gaya pengada Jesus Kristus. Indai Iya Maria udah betunang enggau Josep, tang sebedau seduai iya jadi melaki-bini, iya betubuh-bisi ulih kuasa Roh Kudus.

Laban tunang iya, Josep, endang orang ke lurus, lalu enggai ngemaluka Maria di mua orang mayuh, nya alai iya berunding deka muai Maria ngena chara belalai.

Tang lebuh Josep benung berundingka nya, siku melikat Tuhan pegari di mua iya dalam mimpi, lalu bejaku, “Josep, anak David, anang takut ngambi Maria nyadika bini nuan, laban iya betubuh-bisi ulih kuasa Roh Kudus.

Iya deka ngadaka anak lelaki siku, lalu nuan deka meri Iya nama Jesus, laban Iya deka nyelamatka nembiak Iya ari dosa sida.”

Lebuh Josep dani, iya lalu nitihka jaku melikat Tuhan. Iya jadi enggau Maria.

Tauka: Luke 2: 41 - 51A

Nyadi genap taun apai indai Jesus mansang ngagai Jerusalem deka ngintu Gawai Paska.

Lalu lebuh Jesus umur dua belas taun, sida mupuk ngagai Gawai nya baka selama.

Tembu Gawai nya, lebuh sida mulaika diri, Nembiak nya, iya nya Jesus, ninggalka Diri di Jerusalem, tang apai indai Iya enda nemu nya.

Seduai iya bejalai sehari nya ngumbai Iya bejalai enggau raban sida empu. Udah nya seduai iya lalu belabuh begigaka Iya ba bala kaban belayan enggau pangan sida.

Lebuh seduai iya nadai tetemuka Iya, seduai iya lalu nikal ngagai Jerusalem, ngiga Iya.

Tiga hari udah bekau nya, nya baru seduai iya tetemuka Iya dalam Rumah Sembiang, duduk enggau bala pengajar, mendingka sida, sereta betanyaka utai ngagai sida.

Lalu semua orang ke ninga Iya balat alit ati ninga penalam penemu enggau saut Iya.

Lebuh apai indai Iya meda Iya, seduai iya balat alit ati, lalu ku indai Iya bejaku enggau Iya, “Anak, nama kebuah Nuan miaka kami duai apai nuan baka tu? Peda Nuan, kami duai apai Nuan udah irau ati begigaka Nuan.”

Iya lalu nyaut, “Nama kebuah seduai begigaka Aku? Kati seduai enda nemu Aku endang enda tau enda diau dalam rumah Apai Aku?”

Tang seduai iya enda meretika utai ti disebut Iya ngagai seduai.

Iya lalu mupuk enggau seduai iya lalu datai di Nasaret. Iya ngasika seduai iya.