2 March 2019 - Hari Enam ba Minggu Ketujuh Musim Selama
Cari Berita

Advertisement

2 March 2019 - Hari Enam ba Minggu Ketujuh Musim Selama

Staf @beritaibanMY
March 2, 2019

Orang mai anak mit ngagai Jesus, ngambika Iya ngengkahka jari Iya atas sida. 

Bacha Ke Satu: Sirak 17: 1 - 20

Tuhan ngaga mensia ari tanah, lalu ngasuh sida pulai ke tanah. Iya ngeletak umur sida, lalu meri sida kuasa atas semua utai di dunya tu. 

Iya ngaga sida baka gamal Iya empu, lalu meri sida pengering. Tuhan ngaga sida dikenakutka semua utai idup, lalu meri sida kuasa atas semua burung enggau jelu.

Iya meri sida dilah, mata, pending enggau untak kena bepikir.

Iya meri sida penemu enggau pemereti ngambika sida ngelala pemanah enggau penyai.

Iya meri sida pemereti Iya ke dalam ati sida ngambika sida meda pengawa Iya ti manah.

Nya baru sida deka muji nama Iya ti kudus, lalu meritaka pemesai pengawa Iya.

Kelimpah ari nya Tuhan meri sida penemu, lalu meri sida Adat ke lalau pengidup sida.

Iya ngaga sempekat ti tetap enggau sida, lalu madahka pemutus Iya ngagai sida.

Sida meda pemesai mulia Iya, lalu ninga nyawa Iya ti bekuasa.

Iya nangkan sida ngambi enda ngaga penyai, lalu ngajar genap iku sida begulai manah enggau pangan diri.

Tuhan sigi selalu nemu ulah mensia. Sida enda ulih belalai ari Iya. 

Genap bansa diberi Iya siku tuai, tang bansa Israel enggi Tuhan empu. 

Tuhan selalu ngemataka pengawa mensia. Ba Tuhan semua pengawa mensia sigi terang baka siang hari. 

Nadai penyai mensia ulih dipelalaika ari Tuhan, semua penyalah ditemu Iya magang.

Masmur Entara: Masmur 103: 13 - 14, 15 - 16, 17 - 18

Saut (peda 17): Pengerindu TUHAN deka meruan belama iya ba orang ke nangika Iya.

Ke Satu
Baka apai ke nelap enggau anak diri, 
baka nya meh TUHAN nelap enggau orang ke nangika Iya.
Iya nemu utai ti udah dikena ngaga kitai. 
Iya ingatka kitai tu endang amau.

Saut: Pengerindu TUHAN deka meruan belama iya ba orang ke nangika Iya.

Ke Dua
Ba pasal kitai empu, kitai tu baka rumput. 
Kitai tumbuh lalu idup baka bungai babas.
Udah nya ribut muputka iya, 
lalu iya nadai agi, nadai agi dipeda orang.

SautPengerindu TUHAN deka meruan belama iya ba orang ke nangika Iya.

Ke Tiga
Tang pengerindu TUHAN deka meruan belama iya 
ba orang ke nangika Iya, 
lalu pengelurus Iya deka meruan ari serak siti ngagai serak siti,
orang ke nitihka sempekat TUHAN sereta tetap ati ngasika pesan Iya.

SautPengerindu TUHAN deka meruan belama iya ba orang ke nangika Iya.

Alleluia / Aklamasi sebedau Injil (peda Matthew 11: 25)

Alleluia, alleluia
Pujika Nuan Apai, Tuhan ke bekuasa di serega enggau di dunya, 
laban Nuan udah mandangka misteria Perintah ngagai bala anak mit.
Alleluia.

Bacha Injil: Mark 10: 13 - 16

Orang mai anak mit ngagai Jesus, ngambika Iya ngengkahka jari Iya atas sida. 

Sida murid lalu nganu orang nya.

Tang lebuh Jesus meda nya, Iya pedis ati lalu bejaku ngagai sida murid Iya, “Awakka sida ke mit datai ngagai Aku.

Anang nagang sida, laban Perintah Allah Taala diempu orang ke baka sida tu.

Enggau bendar Aku madah ngagai kita, barang sapa enda nerima Perintah Allah Taala baka anak mit, enda ulih tama ngagai Perintah nya.”

Iya lalu merap sida anak mit nya, ngengkahka jari Iya atas sida, lalu merekatka sida.