29 March 2019 - Hari Lima ba Minggu Ketiga Musim Lent
Cari Berita

Advertisement

29 March 2019 - Hari Lima ba Minggu Ketiga Musim Lent

Chief Editor | Berita Iban MY
March 29, 2019

Mark 12: 28 - 34
“Betul utai ti ku Nuan, Pengajar! Munyi ti ku Nuan, ‘Allah Taala endang siku aja, lalu nadai petara bukai. - Mark 12: 28 -34.

Bacha Ke Satu: Hosea 14: 1 - 9

Ku TUHAN bejaku:

O kita orang Israel, pulai meh kita baru ngagai TUHAN Allah Taala kita. Dosa kita udah ngasuh kita tesangkut lalu tetingkap.

Pulai meh kita baru ngagai TUHAN, lalu awakka sampi tu nyadika piring kita ngagai Iya: “Buai semua dosa kami, lalu terima meh sampi kami, lalu kami deka muji Nuan munyi ti udah disemaya kami.

Asiria nadai ulih ngidupka kami, lalu kuda perang enda ulih nyaga kami. Kami enggai agi nyebut ngagai engkeramba kami, ngumbai sida nya Allah Taala kami. O TUHAN, Nuan kasihka orang ke nadai petara bukai alai sida ngadap.”

Ku TUHAN bejaku, “Aku deka mai bala nembiak Aku pulai baru ngagai Aku. Aku deka rinduka sida enggau pengabis ati Aku. Aku enda agi ringat ngagai sida.

Ba orang Israel, Aku deka nyadi baka ujan ti labuh ba tanah ti rangkai. Sida deka bekuntum baka bungai. Sida deka beurat tegap baka kayu di menua Lebanon.

Sida deka idup lalu nelesak baru, sereta manah gaya baka kayu kana. Sida deka bebau rengut baka kayu sidar di menua Lebanon.

Sekali agi sida deka idup dilindung Aku. Sida deka galak baka gandum lalu sida deka bebuah lebat baka kebun anggur. Sida deka beberita baka wain menua Lebanon.

Orang Israel  enggai agi bekaul enggau engkeramba. Aku deka nyaut sampi sida, lalu ngibun sida. Baka kayu ti enda nemu layu, Aku deka ngelindung sida. Aku tu meh penatai semua berekat sida.”

Awakka sida ke bepenemu-dalam meretika utai ti ditulis ditu, lalu awakka sida nyimpan utai nya dalam ati sida. Jalai TUHAN endang ngena, lalu orang ke lurus sigi idup nitihka jalai nya, tang orang ke bedosa tesangkut lalu tetingkap laban sida enda begunaka jalai nya.

Masmur Entara: Masmur 81: 5C - 7A, 7BC - 8, 9 - 10AB, 13 & 16

Saut (peda 10 & 8a): Aku tu TUHAN Allah Taala kita: Pendingka jaku tangkan Aku.

Ke Satu
Aku ninga munyi nyawa ti enda dikelala bejaku,
“Aku ngingkaska ma ti berat ari belakang kita. 
ku ngasuh kita ngelengkaka batu bata ari jari kita.
Lebuh kita kena laban penusah, kita ngangauka Aku, 
lalu Aku ngelepaska kita.

SautAku tu TUHAN Allah Taala kita: Pendingka jaku tangkan Aku.

Ke Dua
Ari endur alai Aku ke belalai dalam biaubalai, Aku nyaut kita. 
Aku nguji kita ba mata ai di Meribah.
Pendingka jaku tangkan Aku, kita ke nembiak Aku. 
Israel, naka meh pemanah enti kita deka mendingka Aku!

SautAku tu TUHAN Allah Taala kita: Pendingka jaku tangkan Aku.

Ke Tiga
Kita enda tau sekali-kali nyembah petara bukai. 
Aku tu TUHAN Allah Taala kita, 
ti udah mai kita pansut ari menua Ejip.

SautAku tu TUHAN Allah Taala kita: Pendingka jaku tangkan Aku.

Ke Empat
Naka meh pemanah enti bala nembiak Aku deka mendingka Aku. 
Naka meh pemanah enti sida deka ngasika Aku!
Tang aku deka nupi kita ngena gandum ti pemadu manah 
lalu ngasuh kita kenyang ngena ai manyi.”

SautAku tu TUHAN Allah Taala kita: Pendingka jaku tangkan Aku.

Aklamasi sebedau Injil (peda Matthew 4: 17):

Nesal ati ke dosa kita, ku TUHAN:
laban Perintah serega nyau semak!

Bacha Injil: Mark 12: 28 - 34

Siku pengajar Adat datai semak lalu ninga sida bekelikuh enggau pangan diri. Lebuh iya ninga pemanah saut Jesus, iya lalu nanya Jesus, “Ni pesan ti pemadu besai?.”

Jesus lalu nyaut, “Pesan ti pemadu besai nya, ‘Pendingka tu, O kita orang Israel! Tuhan Allah Taala kitai endang siku aja.

Kita enda tau enda rinduka Tuhan Allah Taala kita, enggau pengabis ati kita, enggau pengabis semengat kita, enggau pengabis runding kita, enggau pengabis pengering kita.’

Pesan ti lumur dua nya: ‘Rinduka pangan nuan, baka nuan ke rinduka diri empu.’ Nadai pesan bukai ti besai agi ari pesan dua bengkah nya.”

Pengajar Adat nya lalu bejaku ngagai Iya, “Betul utai ti ku Nuan, Pengajar! Munyi ti ku Nuan, ‘Allah Taala endang siku aja, lalu nadai petara bukai, kelimpah ari Iya,’ lalu ‘rinduka Iya enggau pengabis ati nuan, enggau pengabis runding nuan, enggau pengabis pengering nuan,’ lalu ‘rinduka pangan diri baka nuan ke rinduka diri empu.’ Tu lebih agi beguna ari semua piring tunu enggau semua piring bukai.”

Lebuh Jesus meda iya udah nyaut enggau betul, Iya lalu bejaku ngagai iya, “Nuan enda jauh ari Perintah Allah Taala.” Udah bekau nya, nadai orang agi berani nanyaka utai ngagai Iya.