Header Ads

  • Baru Nyadi

    4 March 2019 - Hari Satu ba Minggu Kelapan Musim Selama

    Lebuh lelaki nya ninga nya, mua iya lalu bebali tusah lalu mupuk ari endur nya enggau ati ti balat tusah, laban iya kaya bendar.

    Bacha Ke Satu: Sirak 17: 24 - 29

    Tang orang ke nesal ati diterima pulai ngagai Iya, lalu orang ke lenyau pengandal deka diperindang Iya.

    Datai meh ngagai Tuhan, lalu lengkaka penyalah kita. Besembiang di mua Iya, lalu anang majak ngaga penyai. 

    Pulai meh ngagai Tuhan ke Pemadu Bekuasa, lalu anang agi ngaga penyalah. Begedi meh ke penyai enggau naka ulih kita. 

    Orang ke idup ulih meri terima kasih ngagai Tuhan. Tang ba dunya pemati, sapa ke ulih menanyi muji Iya ke Pemadu Bekuasa? 

    Orang ke idup sereta gerai ulih muji Tuhan. Tang sida ke parai udah nadai agi; sida udah badu meri terima kasih. 

    Naka meh pemesai pengasih enggau pengampun Tuhan ngagai orang ke pulai ngagai Iya.

    Masmur Entara: Masmur 32: 1 - 2, 5, 6, 7

    Saut (peda 11a): Lantang sereta rami gaga meh kita ke lurus ketegal utai ti udah dikereja TUHAN.

    Ke Satu
    Beberekat meh orang lebuh dosa 
    enggau penyalah sida diampun.
    Beberekat meh orang ke enda dikumbai TUHAN bisi penyalah 
    lalu enda nipu orang.

    Saut: Lantang sereta rami gaga meh kita ke lurus ketegal utai ti udah dikereja TUHAN.

    Ke Dua
    Udah nya aku ngaku dosa aku ngagai Nuan, 
    lalu aku enda ngelalaika penyalah diri. 
    Aku ngaku utai nya ngagai Nuan, 
    lalu Nuan ngampun semua dosa aku.

    SautLantang sereta rami gaga meh kita ke lurus ketegal utai ti udah dikereja TUHAN.

    Ke Tiga
    Nya alai semua nembiak Nuan ke taluk ngagai Nuan
    patut besampi ngagai Nuan lebuh sida dituntung penusah
    ngambika penusah nya enda datai ba sida.

    SautLantang sereta rami gaga meh kita ke lurus ketegal utai ti udah dikereja TUHAN.

    Ke Empat
    Nuan nyadi endur alai aku belalai. 
    Nuan deka ngelepaska aku ari penusah. 
    Aku belagu enggau nyawa ti inggar muji pengelepas ti datai ari Nuan, 
    laban Nuan nyaga aku.

    SautLantang sereta rami gaga meh kita ke lurus ketegal utai ti udah dikereja TUHAN.

    Alleluia / Aklamasi sebedau Injil (peda 2 Korint 8: 9)

    Alleluia, alleluia
    Jesus Kristus Tuhan kitai: taja pen Iya kaya, Iya nyadi seranta, 
    ngambika ulih penyeranta Iya, kita tau nyadi kaya.
    Alleluia.

    Bacha Injil: Mark 10: 17 - 27

    Lebuh Jesus baru deka mupuk, siku lelaki belanda datai lalu besugang di mua Iya, lalu nanya, “Pengajar ti manah, nama utai ti enda tau enda dikereja aku ngambika aku bulih pengidup ti meruan belama iya?”

    Ku Jesus bejaku ngagai iya, “Nama kebuah nuan ngumbai Aku manah?Nadai orang ke manah. Semina Allah Taala siku aja manah.

    Nuan nemu pesan: 
    ‘Anang munuh orang; 
    Anang butang; 
    Anang ngenchuri; 
    Anang betenahka orang; 
    Anang nipu orang; 
    Bebasaka apai indai nuan.’”

    Orang nya lalu nyaut, “Pengajar, semua pesan nya udah dititihka aku magang kenyau ari aku agi biak.”

    Jesus merening ngagai iya, rinduka iya, lalu bejaku ngagai iya, “Siti utai apin dikereja nuan. Mupuk nuan lalu jual semua utai ti dikemisi nuan, lalu beri ngagai orang ke seranta. Nya baru nuan bisi pengaya di serega. Udah nya titihka Aku.”

    Lebuh lelaki nya ninga nya, mua iya lalu bebali tusah lalu mupuk ari endur nya enggau ati ti balat tusah, laban iya kaya bendar.

    Jesus lalu malik kiba kanan, lalu bejaku ngagai sida murid Iya, “Mar amat meh orang ke kaya tama ngagai Perintah Allah Taala!”

    Sida murid tusah ati ninga nya, tang ku Jesus bejaku ngagai sida, “Anak, mar amat meh tama ngagai Perintah Allah Taala!

    Nyamai agi jelu unta tama nengah lubang jarum ari orang ke kaya tama ngagai Perintah Allah Taala.”

    Sida lalu balat amat alit ati, lalu bejaku enggau pangan diri, “Enti pia, sapa ulih diselamatka?”

    Jesus merening ngagai sida, lalu bejaku, “Ba mensia, utai tu enda ulih, tang ba Allah Taala utai tu enda baka nya, laban ba Allah Taala semua utai ulih magang.”

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads