Dua menyadi bebadi nyawa, dua iku bakal, eksiden di KM69, Jalai Pesisir Pantai Bintulu - Miri
Cari Berita

Advertisement

Dua menyadi bebadi nyawa, dua iku bakal, eksiden di KM69, Jalai Pesisir Pantai Bintulu - Miri

Chief Editor | Berita Iban MY
March 11, 2019

Pendiau kerita enggau Hilux pengudah eksiden di KM69, Jalai Pesisir Pantai Bintulu-Miri, urung 7.19 pagi tadi.

MIRI: Dua menyadi bebadi nyawa, tang dua iku agi diripotka bakal pengudah sebuah kerita enggau sebuah Hilux belantak, di KM69, Jalai Pesisir Pantai Bintulu-Miri, urung 7.19 pagi tadi.

Seduai dua menyadi nya (mansa) dikelala ngena nama Mejelin Tingga Galang, 41 taun enggau Chaterine Empina Galang, 36 taun, orang ari Rumah Melina, Sepupok Ulu Batu Niah, diripotka ngapuska seput kepenudi ba palan eksiden ke nyadi ketegal balat bakal.

Ketuai Opis Tasat enggau Penguasa Trafik Sarawak, Superintenden Alexson Naga Chabu, madahka dua menyadi nya duduk ba belakang lebuh eksiden nya nyadi.

Kelimpah nya, deriba kerita, Melina Lasa, orang ari rumah panjai ke sama, diripotka bakal tang deriba Hilux nya, 30 taun, orang ari Sabah ti kereja di Miri, semina bakal mimit aja.

"Lebuh eksiden nyadi, kerita ke ditepan Melina enggau seduai dua menyadi (mansa) nya benung dirantau jalai ari muak Bintulu nuju ke Miri enggau dilantak sebuah Hilux ke datai ari jalai ngelaban arus.

"Hilux nya dipechayaka enda ulih dijaga lalu tama ke jalai ngelaban arus enggau ngejung ke ngelantak kerita ke ditepan sida tiga nya,” ku iya lebuh ke dirandau pengarang berita, seharitu tadi.

"Berindik ari eksiden nya, dua buah entuka nya tepawah ke tisi jalai sereta singit enggau ngejung ke seduai dua menyadi nya bebadi nyawa ba palan eksiden ke nyadi," ku iya.

Nangkan ke nya, bangkai dua menyadi nya dianjung ke Sepital Miri kena bejalaika pengawa buntas tasat, tang 'mansa' ke bakal dianjung ke Klinik Perintah Batu Niah.

Kes nya dipansik ari baruh "Seksyen 41(1) Akta Pengangkutan Jalan 1987".