NGASU: Siku lelaki parai kena timbak bakih iya empu
Cari Berita

Advertisement

NGASU: Siku lelaki parai kena timbak bakih iya empu

Staf @beritaibanMY
March 9, 2019

Senapang patah ke dipechayaka kena 'saspek' nimbak 'mansa' ba palan penusah ke nyadi. 

BETONG: Siku lelaki parai pengudah kena timbak bakih iya lebuh ngasu kemari.

Lelaki ke parai nya dikelala ngena nama Entri Thomas Tama, diripotka nurun ngasu begulai enggau bakih iya ba kebun getah semak Rumah Panjang Ming Nyelutong, urung jam 6 lemai, Hari Lima.

Nitihka penerang, lelaki nya (mansa) dipechayaka benung ngabas panjuk ke ditan iya ba palan penusah ke nyadi. Tang taja pia, 'mansa' nya dipeda bakih ke sama ngasu enggau iya baka siku jani kampung lalu ngejung ke iya (saspek) ngachitka senapang nuju 'mansa' nya.

'Saspek' tekenyit pengudah ninga munyi baka mensia ti nyerauh ngetatka pemedis.

"'Saspek' lalu belandak nuju ke endur orang ke nyerauh nya enggau tepedaka bakih iya (mansa) bisi bekau timbak ba dada sereta dibalut darah," ku penerang.

Nangkan ke nya, 'saspek' nguji nyelamatka 'mansa' tang tejanggal enggau 'mansa' diripotka bebadi nyawa ba palan penusah ke nyadi.

Berindik ari nya, 'saspek', 51 taun ngaga ripot polis di balai Polis Pampang (IPD) Betong.

Ketuai Polis Pampang Betong, DSP Mohd Fahdil Antum, madah bisi nerima ripot bekaul penusah ke nyadi enggau 'saspek' nya udah ditan kena bejalaika pengawa nasat.

"Asil pansik tumu, 'saspek' madahka iya bisi tepedaka siku jani kampung  ba atas bukit urung penyauh 15 meter enggau iya lalu ngachitka senapang nuju jani nya sebedau iya ninga munyi orang nyerauh," ku iya.

Kelimpah ari nya, polis mega ngerampas senapang patah ke dipechayaka kena 'saspek' nimbak 'mansa' ba palan penusah ke nyadi.

Kes dipansik ari baruh "Seksyen 304A kanun keseksaan".