Ngemba menyadi ngena senapang, kelalu inggar lebuh main 'games' ba talipaun
Cari Berita

Advertisement

Ngemba menyadi ngena senapang, kelalu inggar lebuh main 'games' ba talipaun

Frankie John™
March 23, 2019

KEMPANG ATI: Senapang ke dipechayaka kena saspek ngemba menyadi iya.


KINABATANGAN: Siku lelaki nuju ke senapang gaga iya empu ba menyadi iya ketegal inggar lebuh main games ba talipaun binching di Kinabatangan, sebedau ditan polis, kena 21 Mac (Hari Empat).

Lebuh penusah nyadi urung jam 11.30 pagi nya, saspek dipechayaka nuju ke  senapang ke digaga iya nya ba tubuh mansa sebedau nyebut 'anang inggar'.

Nitihka penerang, penusah nyadi kena 10 Januari, pun taun tu tadi ba rumah sida iya di Kampung Warisan, Kinababtangan tang mansa ke beumur 18 taun, ngaga ripot polis kena 21 Mac 2019.

Sapit Ketuai Polis Pampang Kinabatangan, Asisten Superintendan Mohammad Azwan Abdul Wahab, madahka saspek mujur ditangkap raban Polis Tasat Jenayah, Opis Polis Pampang (IPD) Kinabatangan lebuh Op Cantas dipejalaika di Kampung Warisan.

Ku iya, saspek, 27 taun nya ditan lebuh abis ngenyit dipejalaika urung jam 9.30 malam lebuh iya benung tinduk di rumah.

“Asil peresa silik ba bilik saspek, raban polis bisi tetemuka siti senapang ke dipechayaka gaga iya empu enggau dikena ngemba menyadi iya.

Saspek pengudah nya dibaie ke Opis Polis Pampang (IPD) Kinabatangan kena bejalaika pengawa nasat,” ku iya lebuh ke dirandau pengarang berita, sehari tu tadi

Saspek ngaku diri ngempu senapang nya enggau asil pansik silik saspek nadai kala ngereja pekara ti bekaul enggau jenayah,” ku iya.

Kes nya agi dipansik ari baruh Seksyen 506 Kanun Keseksaan.