Siku indu ditan polis, dipechayaka nguji muai anak iya ti baru ada ke dalam mangkuk jamban
Cari Berita

Advertisement

Siku indu ditan polis, dipechayaka nguji muai anak iya ti baru ada ke dalam mangkuk jamban

Chief Editor | Berita Iban MY
March 11, 2019

KASIH AMAT: Anak mit (mansa) ti deka dibuai indai iya (saspek) ke dalam mangkuk jamban diripotka nadai nenama enggau agi diperubatka ba sepital ke sama.

KUALA LUMPUR: Siku indu beumur 20 taun ditan polis pengudah dipechayaka muai anak iya ke dalam mangkuk jamban di Sepital Selayang, ditu, lemai kemari.

Indu nya ditan polis pengudah bisi saksi meda ulah iya ti nguji muai anak iya ti baru ada ke dalam mangkuk jamban indu ba 'Zon Kecemasan' sepital nya.

Ketuai Polis Pampang Gombak, Asisten Komisioner Samsor Maarof, madahka pengudah saksi nya meda ulah ti digaga indu nya, iya lalu ngeripotka pekara nya ngagai sekuriti.

"Pengudah nerima ripot ari saksi nya, sekuriti lalu berumban ngesah ke palan penusah ke nyadi enggau mujur nyelamatka anak mit nya ari dibuai indai iya (saspek).

"Nangkan ke nya, dianjung peresa enggau lutor ngeripotka nadai nenama tauka nadai bakal," ku iya lebuh ke dirandau pengarang berita, kemari.

Ku Samsor, indu nya dipechayaka baru udah ngadaka anak iya nya kemari tang pansik silik deka dipejalai pengudah iya diperubatka ba sepital ke sama.

"Naka kediatu, indu nya (saspek) ditan ba wad Zon Mirah di sepital nya enggau iya enggai bejaku lebuh ke dirandau kutor ti deka ngubat tauka meresa iya.

"Iya semina nyabak pengudah dipindah ke wad Zon Mirah," ku iya.

"Asil pansik tumu, indu nya nadai ngembuan rikod jenayah enggau kes nya dipansik ari baruh 'Seksyen 317 Kanun Keseksaan'", tandu iya.