Siku indu kena pantap, rumpak ba mua rumah ke diuan iya
Cari Berita

Advertisement

Siku indu kena pantap, rumpak ba mua rumah ke diuan iya

Staf @beritaibanMY
March 6, 2019

NADAI ADAT: Dua lelaki (saspek) ngena sebuah motosikal ngetu ba mua rumah indu nya (mansa).

GOMBAK: Siku indu kena pantap dua lelaki ngena motosikal ti ngerumpak iya ba mua rumah ke diuan di Taman Sri Gombak, Gombak, kemari.
Penusah nyadi urung jam 2 lemai nya, rikod CCTV (kamera litar tertutup) ba palan penusah ke nyadi mega bisi ba media sosial enggau chapuh 'viral', malam tadi.
Ba video CCTV pengelama 41 sikin nya, mandangka dua lelaki (saspek) ngena motosikal Yamaha Y150 chura mirah ngetu ba belakang sebuah kereta Proton Satria ke paking ba mua rumah indu nya (mansa).
Bakih 'saspek' ke sama nepan motosikal nya dipechayaka bisi mai duku nurun lalu ngerumpak indu nya, tang siku agi 'saspek' ke deriba motosikal nya mutarka motosikal ke ditepan seduai iya ngambika muntang ngelarika diri. 
Nangkan ke nya, deriba motosikal  nya mega nurun sereta mai duku lalu nyamah 'mansa'.
Pengudah nya, seduai iya berumban ngelarika diri ari palan penusah ke nyadi. 
Nitihka penerang ke diterima kami, 'saspek' udah nabanka gelang emas ke diempu indu nya 'mansa' enggau indu nya mega diripotka bakal pengudah kena pantap dua 'saspek' nya.
Sapit Ketuai Polis Pampang Gombak, Superintendan Arsad Kamaruddin, lebuh ke dirandau pengarang berita, madahka raban polis bisi nerima ripot bekaul penusah ke nyadi nya. 
"Pansik silik deka dipejalaika enggau kes nya deka ditasat nitihka "Seksyen 395/397 Kanun Keseksaan"," ku iya.