Siku indu nanjah mua entua iya ngena ai angat di Sibu
Cari Berita

Advertisement

Siku indu nanjah mua entua iya ngena ai angat di Sibu

Frankie John™
March 29, 2019

KASIH AMAT: Mua entua indu nya pengudah ditanjah iya ngena ai angat.

SIBU
: Semina ketegal enggai dilara tauka ditagang mai bakih indu tama ke rumah lebuh laki iya nadai di rumah, siku indu (menantu) kempang ati nanjah mua entua indu iya ngena ai angat.

Penusah nya nyadi dipechayaka bepun ari entua indu (victim) enggau menantu iya (saspek), orang indon, bisi saru penemu tauka belaya ba sebuah rumah sewa tingkat atas di Jalai Laichee, urung jam 3.00 lemai, Hari Dua tu tadi.

Ketuai Polis Pampang Sibu, ACP Stanley Jonathan Ringgit, madahka entua indu nya, 62 taun,  diripotka betu ba mua sepiak kiba, dada, berang enggau pah sepiak kiba. 

Ku iya, lebuh penusah nyadi bisi dipeda (saksi) siku indu sebedau iya ngaga ripot polis.

"Entua indu nya pengudah nya belanda pansut ari rumah nya enggau minta tulung orang ke berimbai rumah ngunsut abi betu ngena ubat ngeli," ku iya lebuh ke dirandau pengarang berita, lemai kemari.

Ku iya, saksi enggau anak lelaki mansa ngaga ripot polis sebedau indai iya dianjung berubat silik ke Sepital Sibu urung jam 3.00 lemai, Hari Tiga tu tadi.

"Asil peresa silik, lutur ke meresa mansa madahka mua, tubuh, dada enggau berang sepiak kiba entua indu nya udah betu dua peratus.

"Berindik ari ripotka diterima, polis udah mujur nangkap saspek enggau kad pas nemuai menantu iya nya udah ambis timpuh kena 3 November 2016," ku iya.

Ku Stanley, polis mega ngerampas siti kitil karan ke dipechayaka kena indu nya nanjah entua iya.

"Kes nya agi dipansik ari baruh ari baruh Seksyen 325 Kanun Keseksaan ketegal mungkal ngemediska entua iya," tandu iya.