Siku lelaki bebadi nyawa, timbak bakih ke sama ngasu di Sibu
Cari Berita

Advertisement

Siku lelaki bebadi nyawa, timbak bakih ke sama ngasu di Sibu

Frankie John™
March 31, 2019

Gambar pengias.

SIBU: Siku lelaki bebadi nyawa pengudah kena timbak bakih ke sama enggau iya ngasu ba Putai di Kapit, lemai kemari (Hari Enam).

Mansa dikelala ngena nama Liee Amat, 40 taun, orang ari Rumah Roma, Sungai Ranan di Kanowit.

Lebuh penusah nyadi urung jam 3 lemai nya, pengudah datai ba Putai, empat iku ari sida iya nurun ke sungai laban deka ngetan pukat, tang mansa enggau saspek tama ke kampung laban deka ngasu. 

Ketuai Polis Pampang Kapit, DSP Freddy Bian, madahka mansa enggau saspek bepecah tauka enda begulai lebuh datai ba endur ngasu.

"Lebuh seduai iya udah bepecah, saspek bisi ningga munyi jelu bejalai ba sepiak kanan urung penyauh 100 kaki enggau nyangka utai ti memunyi nya jani kampung. 

"Nadai berunding panjai, saspek lalu ngachitka senapang endur utai ke munyi nya enggau enda lama pengudah nya saspek bisi ninga nyawa bakih iya nyerauh," ku iya lebuh ke dirandau pengarang berita sehari tu tadi.

"Nangkan ke nya, saspek lalu berumban ngesah ke endur bakih iya nyerauh nya enggau iya meda mansa benung gali enggau tubuh dibalut darah ti meachir-achir.

Ku iya, mansa pengudah nya pansut ari palan penusah ke nyadi enggau nganggauka  empat iku agi bakih ke ngetan ba sungai ngambika ulih nyelamatka mansa.

"Taja taja pia, lebuh sida iya lima datai ba palan penusah ke nyadi, sida iya meda mansa nyau udah enda enseput agi tauka udah nadai," ku iya.

Saspek enggau empat iku agi bakih iya mai bangkai mansa pansut ari palan penusah ke nyadi sebedau ngaga ripot polis enggau nyuakka bangkai mansa ngagai raban polis.

Saspek, 44 taun, orang serumah panjai enggau mansa.

Freddy madah, asil pansik tumu, senapang ti kena saspek lebuh ngasu nya bisi lesen tauka bisi direjista. 

"Raban polis deka bejalaika pengawa nasat ba semua sida iya (saspek enggau empat bakih iya). Raban polis mega udah nangkap saspek enggau ngerampas semua perengka guna ke dikena lebuh penusah nyadi.

"Naka kediatu, saspek diatu ditan ba lokap Balai Polis Kapit enggau kes tu deka dipansik enggau silik agi," tandu Freddy.