Siku lelaki maluk siku anak mit 6 taun nyentukka bakal ketegal enda ngaga kereja sekula
Cari Berita

Advertisement

Siku lelaki maluk siku anak mit 6 taun nyentukka bakal ketegal enda ngaga kereja sekula

Staf @beritaibanMY
March 7, 2019

KASIH AMAT: Pendiau lengan enggau mua anak mit nya (mansa) pengudah dipaluk lelaki nya (saspek).

KEDAH: Siku anak mit beumur enam taun, dipaluk siku lelaki (menyadi tuai iya) ketegal enda nembuka kereja sekula subjek matematik.

Nitihka penerang ke diterima kami, abang anak mit nya (saspek) 30 taun, ngeransi sereta maluk iya ngena wie ketegal iya enda nembuka kereja sekula ke diberi pengajar.

Berindik ari nya, anak mit nya diripotka bakal enggau bisi abi paluk ba mua, pending, jari, lengan, kaki enggau ba belakang tubuh iya.

Puji Tuhan, nasib manah bisi orang ke nemu penusah ke ditapi anak mit enggau orang nya lalu ngaga ripot polis.

Nangkan ke nya, raban polis berumban ngesah ke palan penusah ke nyadi urung jam 1 lemai ngambika ulih nyelamatka anak mit nya (mansa), sebedau iya dianjung berubat di Sepital Sultanah Bahiyah.

Kelimpah ari nya, abang anak mit nya udah ditangkap polis enggau asil pemutus peresa ai kemi 'saspek' negatif dadah.

Tang taja pia, nama kebuah 'saspek' maluk tauka nyamah menyadi iya ngemalat nya apin temu.

Nitihka penerang, apai seduai iya diatu agi ditan polis di Thailand ketegal dipechayaka bisi bekait enggau beberapa kes, tang indai seduai iya udah nadai lama.

Kelimpah seduai dua semenyadi, bisi dua iku agi menyadi seduai ianya siku indu enggau siku agi lelaki ke sama mega diibun abang iya nya.