10 April 2019 - Hari Tiga ba Minggu Ke Lima Musim Lent
Cari Berita

Advertisement

10 April 2019 - Hari Tiga ba Minggu Ke Lima Musim Lent

Chief Editor | Berita Iban MY
April 10, 2019

Jesus lalu madah ngagai orang Judah ke udah arapka Iya, “Enti kita bepegai ba jaku Aku, kita amat murid Aku, lalu kita deka nemu pemendar, lalu pemendar deka ngelepaska kita.” - John 8 : 31 - 42

Bacha Ke Satu: Daniel 3: 14 - 20, 24 - 25, 28

Ku Raja Nebukadnesar bejaku enggau sida, “Sadrak, Mesak, enggau Abednego, kati kita amat enggai nyembah petara aku, lalu enggai meremi ngagai engkeramba emas ti didirika aku?

Diatu, lebuh kita ninga munyi terumpit, kesuling, engkeratung, sape enggau belikan, enggau munyi semua kereban musik ti bukai, kita enda tau enda meremi lalu nyembah engkeramba nya. 

Enti kita enda, kita deka tekala nya ditikauka ngagai serumbung api. 

Kati kita bisi petara ti ulih ngelepaska kita ari jari aku?”

Sadrak, Mesak, enggau Abednego lalu nyaut, “O Tuan Raja, kami enda ibuh bejaku ngarika diri empu.

Enti Allah Taala ti dipetuaika kami ulih ngelepaska kami ari api ti mau nya, enggau ari kuasa nuan, awakka Iya meh ngelepaska kami, Tuan Raja.

Tang enti Iya enda ngelepaska kami, kami madahka ngagai nuan Tuan Raja, enggai meh kami nyembah petara nuan, lalu meremi ngagai engkeramba emas ti didirika nuan.”

Nebukadnesar lalu balat amat ringat. 

Mua iya mirah, ringat ngagai Sadrak, Mesak enggau Abednego. 

Iya lalu ngasuh orang masang api dalam serumbung nya tujuh kali angat agi ari selama.

Iya lalu ngasuh orang ke pemadu kering ari bala soldadu iya nanchang sida tiga, lalu nikauka sida ngagai serumbung api nya.

Tekala nya Raja Nebukadnesar lalu bediri, laban iya alit ati. Ku iya nanya ngagai bala pemesai iya, “Ukai enda tiga iku orang ditanchang kita, lalu ditikauka kita ngagai serumbung api nya tadi?” Disaut sida, “Sigi amat, Tuan Raja.”

“Enti pia, nama kebuah aku meda empat iku orang bejalai ba tengah-tengah api nya?” ku iya nanya. “Sida nya enda ditanchang, lalu sida enda bebadi, lalu iya ti keempat nya baka gamal melikat.”

Ku Nebukadnesar bejaku, “Pujika Allah Taala ti disembah Sadrak, Mesak enggau Abednego! Iya udah ngirumka melikat Iya, lalu ngelepaska sida tu ke betuai sereta arapka Iya. 

Sida udah ngelanggar atur aku, lalu berambunka nyawa enggai meremi sereta nyembah petara bukai tang semina Allah Taala sida empu.

Masmur Entara: Sembiang Azariah Enggau Lagu Orang Bujang Tiga Iku: 29 - 30, 31, 32, 33, 34

Saut (peda 30b): Mulia enggau puji belama iya!

Ke Satu
Kami muji Nuan, O Tuhan Allah Taala aki ini kami, 
Awakka nama Nuan ti kudus sereta mulia 
meruan dibasa sereta dipuji belama iya.

SautMulia enggau puji belama iya!

Ke Dua
Awakka lagu puji dinanyi kena muji nama Nuan belama, 
lalu awakka pengudus Nuan ti bisi dalam rumah sembiang nya selalu dipuji.

SautMulia enggau puji belama iya!

Ke Tiga
Dia meh Nuan duduk atas kerusi raja 
ari atas utai ti besayap lalu nilik ke baruh ngagai dunya pemati. 
Awakka Nuan dipuji sereta dibasa belama.

SautMulia enggau puji belama iya!

Ke Empat
Awakka Nuan dipuji lebuh Nuan duduk atas kerusi raja Nuan. 
Awakka lagu puji dinanyi kena ngemesaika Nuan belama.

SautMulia enggau puji belama iya!

Ke Lima
Awakka Nuan dipuji dalam payung serega. 
Awakka lagu puji dinanyi kena ngemesaika Nuan belama.

SautMulia enggau puji belama iya!

Aklamasi sebedau Injil (peda Luke 8: 15):

Beberekat meh orang ke ninga pesan, 
lalu ngingatka iya dalam ati ti manah sereta ngasi, 
lalu sida bebuah enggau ati ti liat sereta tan.

Bacha Injil: John 8: 31 - 42

Jesus lalu madah ngagai orang Judah ke udah arapka Iya, “Enti kita bepegai ba jaku Aku, kita amat murid Aku, lalu kita deka nemu pemendar, lalu pemendar deka ngelepaska kita.”

Sida lalu nyaut Iya, “Kami tu peturun Abraham, lalu nadai udah kala nyadi ulun orang. Nama reti, ‘Kita deka dilepaska’?”

Ku Jesus nyaut sida, “Enggau bendar Aku madah ngagai kita, genap iku orang ke ngereja dosa, nyadi ulun dosa.

Ulun enda diau tetap dalam rumah nya belama iya; tang anak diau dalam rumah nya belama iya.

Nya alai, enti Anak ngelepaska kita, kita amat dilepaska.

Aku nemu kita endang peturun Abraham; tang taja pia, kita ngiga peluang munuh Aku, laban kita enggai nerima jaku Aku.

Aku madahka pasal utai ti udah dipadahka Apai ngagai Aku, baka kita ke ngereja utai ti didinga kita ari apai kita.”

Ku sida nyaut Iya, “Kami anak Abraham.” Disaut Jesus, “Enti kita amat anak Abraham, kita tentu deka ngereja utai ti udah dikereja Abraham, tang diatu kita nguji munuh Aku, ke udah madahka utai ti bendar ti didinga Aku ari Allah Taala. 

Nya ukai utai ti dikereja Abraham.

Kita ngereja utai ti udah dikereja apai kita.” Ku sida bejaku ngagai Iya, “Kami ukai anak ampang. Kami bisi apai. Allah Taala meh Apai kami.”

Ku Jesus bejaku ngagai sida, “Enti Allah Taala amat Apai kita, kita tentu rinduka Aku, laban Aku datai ari Allah Taala, lalu diatu Aku bisi ditu. 

Aku ukai datai nitihka peneka ati Aku Empu, tang Allah Taala ke ngirumka Aku.