14 lelaki ditan polis, nyabung manuk ba sebuah rumah panjai di Suai
Cari Berita

Advertisement

14 lelaki ditan polis, nyabung manuk ba sebuah rumah panjai di Suai

Chief Editor | Berita Iban MY
April 23, 2019

Pendiau ba kelang sabung enggau manuk sabung (graphik mit) muju dirampas polis.

MIRI: 14 lelaki ditan polis lebuh ranchak nyabung manuk ba sebuah rumah panjai di Suai, Miri, kemari.

Lebuh abas ngenyit dipejalaika raban polis, semua lelaki nya beumur 34 nyentuk 61 taun benung ranchak ngemataka manuk ti benung bebintis enggau enda nemu diri disubuk raban polis.

Ketuai Polis Pampang Miri, Asisten Komisioner Lim Meng Seah, madahka semua lelaki ke ditan ba kelang sabung nya ukai orang ari Miri aja tang bisi mega orang ari Bintulu, Kapit enggau Baram.

“Nangkan ke nya, penimbang kena nimbang manuk sabung, dua iku ayam sabung ti udah parai, empat iku manuk sabung agi idup enggau sekepin papan burak ti endur nulis penyampau tuie tauka pasang dirampas raban polis,” ku iya lebuh ke dirandau pengarang berita, sehari tu tadi.

Ku Lim, siku lelaki orang Indon ditan ketegal nadai dokumen pengelala ti sah enggau dipechayaka tama ke menua kitai belalai tauka nadai passpot sah.

“Kes nya dipansik ari baruh Seksyen 3(1) Langkah-Langkah Pencegahan dan Penganiayaan Terhadap Binatang 1962,” ku iya.