2 April 2019 - Hari Dua ba Minggu Ke-Empat Musim Lent
Cari Berita

Advertisement

2 April 2019 - Hari Dua ba Minggu Ke-Empat Musim Lent

Staf @beritaibanMY
Tuesday, April 2, 2019

Lebuh Jesus meda iya, lalu nemu iya endang lama udah gali dia, Iya lalu bejaku ngagai orang nya, “Kati nuan ingin digeraika?” - John 5: 1 - 16

Bacha Ke Satu: Esekiel 47: 1 - 9, 12

Orang nya nguluka aku pulai baru ngagai mua pintu Rumah Sembiang. 

Ai bisi pansut ari baruh semetung pintu nya lalu rarat tunga ke timur, tunga ngagai mua Rumah Sembiang. 

Ai nya rarat ari baruh selatan Rumah Sembiang, lalu mansa tisi selatan alta.

Orang nya lalu mai aku pansut ari kandang Rumah Sembiang nengah pintu utara, lalu nguluka aku ngagai pintu ti nunga ke timur. 

Siti sungai ti mit rarat ari tisi selatan pintu nya.

Ngena batang penyukat iya, iya lalu nyukat 500 meter ngili sungai nya tunga ke timur, lalu ngasuh aku bejalai nengah ai nya. Ai nya semina ngampuhka buku-ali aku.

Udah nya iya nyukat 500 meter baru, lalu ai nya ngampuhka pala patung aku. 

Iya nyukat 500 meter da agi, lalu ai nya datai ba ikas punggung aku.

Iya nyukat 500 meter da agi, lalu ai dia kelalu dalam datai ke aku nyau enda ulih bejalai nengah ai nya agi. 

Ai nya kelalu dalam, lalu enda ulih ditengah enti enda nyemerai.

Ku iya bejaku ngagai aku, “Anak mensia, peratika semua utai tu enggau manah.” 

Udah nya orang nya mai aku pulai baru ke tebing, lalu lebuh aku datai ba tebing, aku tepedaka mayuh amat kayu ba tebing sepiak-sepiak.

Ku iya bejaku ngagai aku, “Ai tu rarat nengah menua tu tunga ke timur, lalu nurun ngagai Lebak Jordan, terus ngagai Tasik Mati. 

Lebuh ai sungai tu rarat ngagai Tasik Mati, iya nganti ai ti masin ba tasik nya ngena ai ti tabar.

Enda milih tunga ai sungai nya rarat, endur nya deka bisi semua macham jelu enggau ikan. Ai sungai nya deka ngasuh ai dalam Tasik Mati tabar, lalu enda milih tunga ai nya rarat, iya deka ngasuh utai dia idup.

Ba tebing sepiak-sepiak sungai nya, semua macham kayu deka tumbuh lalu mansutka utai ti tau diempa. 

Daun sida enda nemu layu, lalu sida enda ngetu bebuah. 

Sida mansutka buah tiap bulan, laban sida bulih ai ari sungai ti rarat ari Rumah Sembiang. 

Kayu dia deka mansutka pemakai, lalu daun sida deka dikena ngeraika orang.”

Masmur Entara: Masmur 46: 1 - 2, 4 - 5, 7 - 8

Saut (7): TUHAN ti Pemadu Bekuasa bisi enggau kitai. Allah Taala Jakop ngelindung kitai.

Ke Satu
Allah Taala endang pengelindung enggau pengering kitai, 
seruran sedia deka nulung lebuh maya penusah.
Nya alai kitai enda takut, enti sema tanah berenyang 
lalu bukit labuh ngagai buntut tasik.

SautTUHAN ti Pemadu Bekuasa bisi enggau kitai. Allah Taala Jakop ngelindung kitai.

Ke Dua
Bisi siti sungai ti mai pengaga ngagai nengeri Allah Taala, 
ngagai rumah kudus Allah Taala ti Pemadu Tinggi.
Allah Taala diau dalam nengeri nya, lalu nengeri nya enda rusak. 
Tumu pagi hari Iya nulung nengeri nya.

SautTUHAN ti Pemadu Bekuasa bisi enggau kitai. Allah Taala Jakop ngelindung kitai.

Ke Tiga
TUHAN ti Pemadu Bekuasa bisi enggau kitai. 
Allah Taala Jakop ngelindung kitai.
Datai lalu peda utai ti dikereja TUHAN. 
Peda pemanah utai ti dikereja Iya di dunya.

SautTUHAN ti Pemadu Bekuasa bisi enggau kitai. Allah Taala Jakop ngelindung kitai.

Aklamasi sebedau Injil (peda Masmur 51: 10A, 12A):

Gaga ati aku tuchi, O Allah Taala; 
Pulaika aku baru ngagai pengaga ti datai ari pengelepas Nuan.

Bacha Injil: John 5: 1 - 16

Udah bekau nya, Jesus mupuk ngagai siti agi gawai orang Judah di Jerusalem.

Nyadi di Jerusalem, ba semak Pintu Bedus, bisi siti letung ti dikumbai Betsata, ti bisi lima buah serambi.

Mayuh amat orang ke sakit, ke buta, ke lemi, enggau ke sakit bajung gali dalam serambi nya.

Sida nganti ai ba letung nya beriak, laban lebuh melikat Tuhan nurun ngagai letung nya, ai dia beriak. 

Orang ke sakit, ke dulu nurun ngagai letung nya lebuh ai nya beriak, digeraika ari sebarang penyakit iya.

Nyadi ba endur nya bisi siku orang ke udah sakit tiga puluh lapan taun.

Lebuh Jesus meda iya, lalu nemu iya endang lama udah gali dia, Iya lalu bejaku ngagai orang nya, “Kati nuan ingin digeraika?”

Ku orang ke sakit nya nyaut Iya, “Tuan, aku nadai orang ngulurka aku ngagai letung nya, lebuh ai nya beriak. 

Lebuh aku benung nguji nurun, orang bukai ga dulu agi nurun ari aku.”

Jesus lalu bejaku ngagai iya, “Angkat nuan. Bai tikai nuan, lalu bejalai.”

Tekala nya orang nya lalu gerai. Iya ngambi tikai iya, lalu bejalai. 

Utai tu nyadi lebuh hari Sabat.

Nya alai bala tuai orang Judah lalu bejaku ngagai orang ke udah digeraika nya, “Tu hari Sabat. Nuan ngelanggar Adat ngesan tikai nuan.”

Tang ku orang nya nyaut sida, “Orang ke ngeraika aku bejaku ngagai aku, ngasuh aku ngambi tikai aku, lalu bejalai.’

Sida lalu nanya iya, “Sapa orang nya ke ngasuh nuan ngambi tikai nuan, lalu ngasuh nuan bejalai?”

Nyadi orang ke udah digeraika nya enda nemu sapa orang nya, laban Jesus udah melesitka Diri ngagai tekang bala mayuh dia.

Udah nya Jesus betemu enggau orang nya dalam Rumah Sembiang, lalu bejaku ngagai iya, “Nuan diatu udah gerai. Anang agi bedosa, enggai ke utai ti jai agi ari nya nyadi ba nuan.”

Orang nya mupuk lalu madah ngagai bala tuai orang Judah, Jesus nya meh orang ke udah ngeraika iya.

Nya alai orang Judah belabuh ngenusahka Jesus, laban Iya ngereja utai nya lebuh hari Sabat.