24 April 2019 - Hari Tiga dalam Minggu ngagai Octave Paska
Cari Berita

Advertisement


24 April 2019 - Hari Tiga dalam Minggu ngagai Octave Paska

Staf @beritaibanMY
April 24, 2019

Lebuh seduai iya benung berandau, Jesus Empu datai semak lalu bejalai enggau seduai iya, tang seduai iya enda ngelala Iya. - Luke 24: 13 - 35

Bacha Ke Satu: Kereja Rasul 3: 1 - 10

Nyadi sekali, lebuh Peter seduai John mansang ngagai Rumah Sembiang lebuh maya besembiang ba urung pukul tiga ngalih hari, siku orang ke enda ulih bejalai kenyau ari ada dibai tama.

Orang ngalika iya tiap hari ba mua pintu ti dikumbai Pintu ti Manah dalam Rumah Sembiang, ngambika iya ulih minta sedekah ari orang ke tama ngagai Rumah Sembiang nya.

Lebuh iya meda Peter seduai John baru deka tama ngagai Rumah Sembiang nya, iya lalu minta sedekah ari seduai iya.

Seduai iya lalu malik ngagai iya, lalu ku Peter bejaku, “Peda nuan kami duai tu!”

Orang nya lalu merening ngagai seduai iya, ngarapka diri deka bulih sedekah ari seduai iya.

Tang ku Peter bejaku, “Aku nadai pirak tauka emas, tang utai ti dikemisi aku, nya meh utai ti diberi aku ngagai nuan: dalam nama Jesus Kristus orang Nasaret, bediri nuan lalu bejalai!”

Peter lalu megai jari kanan iya, lalu ngangkatka iya. Tekala nya kaki enggau buku-ali orang nya lalu kering.

Iya engkejuk angkat, bediri, lalu bejalai, lalu tama ngagai Rumah Sembiang sama enggau Peter seduai John, ama bejalai, ama engkejuk, sereta muji Allah Taala.

Semua orang bela meda iya bejalai sereta muji Allah Taala, lalu sida ngelala iya nya orang ke udah duduk minta sedekah ba mua Pintu ti Manah dalam Rumah Sembiang.

Lalu sida balat alit ati sereta iranka utai ti udah nyadi ba iya.

Masmur Entara: Masmur 105: 1 - 2, 3 - 4, 6 - 7, 8 - 9

Saut (peda 3b): Awakka semua orang ke nyembah TUHAN rami gaga magang.

Ke Satu
Beri terima kasih ngagai TUHAN. Padahka pemesai kuasa Iya.
Tusui ngagai semua bansa utai ti udah dikereja Iya.
Belagu muji TUHAN. Tusui pasal utai ti badas ti udah dikereja Iya.

SautAwakka semua orang ke nyembah TUHAN rami gaga magang.

Ke Dua
Gaga ati meh kitai ke enggi Iya.
Awakka semua orang ke nyembah Iya rami gaga magang.
Mansang meh kitai ngagai TUHAN minta Iya nulung,
lalu sembah Iya berari.

SautAwakka semua orang ke nyembah TUHAN rami gaga magang.

Ke Tiga
Kita peturun Abraham ke nembiak Iya
kita peturun Jakop ti udah dipilih Iya.
TUHAN endang Allah Taala kitai.
Pesan Iya endang ke semua dunya.

SautAwakka semua orang ke nyembah TUHAN rami gaga magang.

Ke Empat
Iya deka ingatka sempekat Iya belama iya,
semaya ti diberi Iya ngagai seribu serak.
Iya deka ingatka sempekat ti udah digaga Iya enggau Abraham
enggau semaya ti digaga Iya enggau Isak.

SautAwakka semua orang ke nyembah TUHAN rami gaga magang.

Alleluia: (peda Masmur 118: 24):

Alleluia, alleluia.
Tu meh hari ti udah digaga TUHAN;
aram kitai rami gaga lalu ngelantangka diri ba hari tu.
Alleluia.

Bacha Injil: Luke 24: 13 - 35

Sehari nya mega dua iku murid mansang ngagai sebuah genturung pendiau ke benama Emaus, kira sebelas kilometer ari Jerusalem.

Seduai iya berandauka pasal semua utai ti udah nyadi.

Lebuh seduai iya benung berandau, Jesus Empu datai semak lalu bejalai enggau seduai iya, tang seduai iya enda ngelala Iya.

Iya lalu bejaku ngagai seduai iya, “Nama utai ti dikerandauka seduai lebuh seduai bejalai tadi?” Seduai iya lalu ngetu sereta berupai tusah ati.

Siku ari seduai iya, ke benama Kliopas, lalu nyaut Iya, “Kati Nuan tu siku temuai di Jerusalem ke enda nemu utai ti udah nyadi dua tiga hari tu ti udah?”

Iya lalu nanya, “Utai nama?” Seduai iya lalu nyaut, “Pasal Jesus orang Nasaret, nabi ti bekuasa dalam pengawa enggau jaku di mua Allah Taala enggau di mua semua orang, enggau chara bala tuai imam kami enggau bala tuai kami nyerahka Iya ngambika Iya diukum bunuh, lalu sida ngeregang Iya.

Tang kami udah ngarapka Iya deka ngelepaska Israel! Sigi amat, lalu nambahka nya, tu ketiga hari utai nya udah nyadi.

Nambahka nya, sekeda indu ari bala kami udah ngasuh kami balat amat alit ati. Sida mansang ngagai kubur tumu pagi tadi, lalu lebuh sida nadai nemu bangkai Iya dia, sida pulai ari kubur lalu madahka diri udah begenera meda melikat, ke madahka Jesus idup.

Sekeda orang ke enggau kami lalu mansang ngabas kubur, lalu nemu utai dia munyi ti dipadahka sida indu, tang sida nadai meda Jesus.”

Jesus lalu bejaku ngagai seduai iya, “Kita amat beli. Lubah amat meh kita arapka semua jaku ti udah disebut sida nabi!

Kati Kristus enda patut natka semua pemerinsa nya, lalu udah nya dimuliaka?”

Jesus lalu nerangka ngagai seduai iya utai di udah disebut dalam semua Bup Kudus pasal Iya Empu, belabuh ari bup Moses enggau semua bup sida nabi.

Lebuh sida nyau datai semak genturung pendiau ti digagai seduai iya, Jesus lalu ngaga Diri baka ke deka majakka pejalai Iya.

Tang seduai iya bebendar ngumbuk Iya. Ku seduai iya bejaku, “Bemalam enggau kami duai, laban hari nyau lemai, hari nyau ka malam.” Iya lalu bemalam enggau seduai iya.

Lebuh Iya belatur deka makai enggau seduai iya, Iya ngambi roti, merekat lalu mechahka roti, lalu nyuaka roti nya ngagai seduai iya.

Nya baru mata seduai iya tebuka, lalu ngelala orang nya Jesus. Iya lalu lesap, nadai dipeda seduai iya agi.

Ku seduai iya bejaku enggau pangan diri, “Enda ka ati tua asai ke disar api lebuh Iya bejaku enggau tua ba jalai raya tadi, lebuh Iya nerangka Bup Kudus ngagai tua?”

Seduai iya lalu tekala nya angkat, lalu pulai ngagai Jerusalem, lalu nemu murid ke sebelas iku begempuru enggau sida murid ti bukai.

Ku sida bejaku, “Tuhan amat udah angkat idup baru, lalu Iya udah pegari di mua Simon!”

Udah nya seduai iya lalu madahka pasal utai ti udah nyadi di rantau jalai, enggau pasal seduai iya ke ngelala Iya lebuh Iya mechahka roti.