4 April 2019 - Hari Empat ba Minggu Ke-Empat Musim Lent
Cari Berita

Advertisement

4 April 2019 - Hari Empat ba Minggu Ke-Empat Musim Lent

Chief Editor | Berita Iban MY
April 4, 2019

Ku Jesus bejaku ngagai orang Parisi: “Enti Aku besaksika pasal Diri Empu, saksi Aku ukai saksi ti bendar. Bisi siku orang ke besaksika Aku, lalu Aku nemu, saksi iya pasal Aku endang amat. Kita ngirumka seruan ngagai John, lalu iya madahka utai ti bendar. - John 5: 31 - 47

Bacha Ke Satu: 
Pemansut 32: 7 - 14

Ku TUHAN bejaku ngagai Moses, “Alai nuan nurun enggau jampat, laban bala nembiak nuan, ti udah diuluka nuan pansut ari menua Ejip, udah bedosa lalu udah nulak Aku.

Sida udah limpang ari jalai Aku. Sida udah ngeluluhka emas lalu ngaga siku anak sapi ti lelaki ari emas nya, lalu udah nyembah sereta ngenjuk piring ngagai utai nya. 

Sida ngumbai utai nya petara ti udah nguluka sida pansut ari menua Ejip.
Aku nemu pengekieh sida.

Nya alai anang nguji nagang Aku. 

Aku ringat ngagai sida, lalu Aku deka ngerusak sida. 

Udah nya baru Aku ngaga nuan enggau peturun nuan nyadi bansa ti kering.”

Tang Moses minta kasih ngagai TUHAN Allah Taala iya. 

Ku iya, “TUHAN, nama kebuah Nuan ringat ngemalat nya ngagai bala nembiak Nuan, ti udah dilepaska Nuan ari menua Ejip ngena pemesai pengering enggau kuasa Nuan?

Enti Nuan ngerusak sida, orang Ejip deka ngumbai Nuan mai nembiak Nuan pansut ari menua Ejip laban Nuan deka munuh sida abis lengis ba sebelah bukit tu. 

Badu agi ringat. 

Ubah runding Nuan, lalu anang ngasuh penusah tu ninggang nembiak Nuan.

Kingatka nembiak Nuan Abraham, Isak enggau Jakop. 

Kingatka Nuan ti udah besemaya enggau sida ngena sumpah deka ngasuh peturun sida ngemayuh bintang ti di langit, lalu meri ngagai peturun sida semua menua ti udah disemaya Nuan nyadika pesaka sida belama iya.”

TUHAN lalu ngubah runding Diri, lalu enda nyadi ngasuh penusah ti besai ninggang nembiak Iya.

Masmur Entara: Masmur 106: 19 - 20, 21 - 22, 23

Saut (4a): Kingatka kami, O TUHAN, lebuh Nuan nulung bala nembiak Nuan.

Ke Satu
Sida ngaga siku anak sapi ari emas di Sinai 
lalu nyembah engkeramba nya.
Sida besilihka mulia Allah Taala 
enggau engkeramba jelu ti makai rumput.

SautKingatka kami, O TUHAN, lebuh Nuan nulung bala nembiak Nuan.

Ke Dua
Sida enda ingatka Allah Taala ti udah ngelepaska sida 
ngena pengawa Iya ti besai di menua Ejip.
Naka meh pemadas utai ti dikereja Iya dia! 
Naka meh penyelai utai ti nyadi ba Tasik Mirah!

SautKingatka kami, O TUHAN, lebuh Nuan nulung bala nembiak Nuan.

Ke Tiga
Lebuh Allah Taala madahka Diri deka ngerusak bala nembiak Iya, 
Moses, ulun ke dipilih Iya bediri nyakal Allah Taala 
lalu nagang pengeringat Iya ngerusak sida.

SautKingatka kami, O TUHAN, lebuh Nuan nulung bala nembiak Nuan.

Aklamasi sebedau Injil (peda John 3: 16):

Allah Taala balat rinduka dunya, nya alai Iya meri Anak Tunggal Iya, 
ngambika genap iku orang ke arapka Iya deka bulih pengidup ti meruan belama iya.

Bacha Injil: John 5: 31 - 47

Ku Jesus bejaku ngagai orang Parisi:

“Enti Aku besaksika pasal Diri Empu, saksi Aku ukai saksi ti bendar.

Bisi siku orang ke besaksika Aku, lalu Aku nemu, saksi iya pasal Aku endang amat.

Kita ngirumka seruan ngagai John, lalu iya madahka utai ti bendar.

Ukai reti nya Aku begunaka saksi mensia, tang Aku nyebut utai tu ngambika kita diselamatka.

John nya lampu ti menyadi lalu manchar, lalu kita gaga ati enda lama ngasaika penampak iya.

Tang saksi Aku besai agi ari saksi John. 

Pengawa ti udah diasuh Apai tembuka Aku, iya nya pengawa ti dikereja Aku diatu, besaksi ngarika Aku nunjukka Apai udah ngirumka Aku.

Lalu Apai, ke ngirumka Aku, udah mega besaksika pasal Aku. 

Kita nadai udah kala ninga nyawa Iya tauka meda Iya, lalu jaku Iya nadai dalam kita, laban kita enda arapka Iya ke dikirumka Apai.

Kita mansik Bup Kudus, laban kita ngumbai diri ulih tetemuka pengidup ti meruan belama iya dalam Bup Kudus. 

Bup Kudus nya ti besaksika pasal Aku! Tang kita enggai datai ngagai Aku lalu bulih pengidup.

Aku ukai minta Diri dipuji mensia.

Tang Aku nemu kita nadai pengerindu Allah Taala dalam kita.

Aku udah datai dalam nama Apai Aku, lalu kita enda nerima Aku. 

Tang enti orang datai dalam nama iya empu, kita nerima iya.

Baka ni ku kita ulih arap, enti kita minta puji pangan diri, lalu enda minta puji ari Allah Taala siku aja?

Anang ngumbai Aku deka bedawaka kita di mua Apai. 

Orang ke deka bedawaka kita nya Moses, ke alai kita manggaika pengadang kita.

Enti kita arapka Moses, kita tentu nemu arapka Aku, laban iya nuliska pasal Aku.

Tang enti kita enda arapka utai ti ditulis iya, baka ni ku kita ulih arapka jaku Aku?”