Header Ads

  • Baru Nyadi

    9 April 2019 - Hari Dua ba Minggu Ke Lima Musim Lent

    Ku Iya bejaku ngagai sida, “Kita datai ari baruh, Aku datai ari atas. Kita endang orang dunya, Aku ukai orang dunya. Aku udah madahka kita deka mati dalam dosa kita, laban kita deka mati dalam dosa kita enti kita enda arapka ‘Aku tu meh Aku.’” - John 8 : 21 - 30

    Bacha Ke Satu: Penyampau 21: 4 - 9

    Orang Israel lalu angkat ari Bukit Hor, nengah jalai ti nuju ngagai Teluk Akaba, ngelaungka menua Edom. 

    Tang di rantau jalai, orang mayuh nyau enda liat ati agi, lalu bejaku ngelaban Allah Taala enggau ngelaban Moses, ku sida, “Nama kebuah nuan mai kami pansut ari menua Ejip lalu nejuka kami mati di menua puang tu, ba endur ti nadai pemakai, nadai ai tu? Kami nyau leju makai pemakai ti enda nyamai tu!”

    Udah nya TUHAN lalu ngasuh ular ti bisa datai ngagai orang mayuh. 

    Ular nya lalu mantuk sida, lalu mayuh amat sida mati.

    Orang mayuh lalu mansang ngagai Moses, lalu bejaku, “Kami udah bedosa laban kami udah bejaku ngelaban TUHAN, enggau ngelaban nuan. Besampi ngagai TUHAN minta Iya muai ular tu.” Moses lalu besampika orang mayuh.

    Udah nya, TUHAN lalu ngasuh Moses ngaga siku ular ari temaga, lalu nuatka ular nya ngena siti tiang; barang sapa kena pantuk ular, deka merening ngagai ular nya, lalu gerai.

    Nya alai Moses ngaga siku ular ari temaga, lalu nuatka ular nya ngena tiang; lalu barang sapa dipantuk ular, deka merening ngagai ular temaga nya, lalu digeraika.

    Masmur Entara: Masmur 102: 1 - 2, 15 - 17, 18 - 20

    Saut (peda 1): Pendingka sampi aku, O TUHAN, lalu dingaka sabak aku ke minta tulung.

    Ke Satu
    Pendingka sampi aku, O TUHAN, 
    lalu dingaka sabak aku ke minta tulung!
    Lebuh aku dituntung penusah, anang ninggalka aku! 
    Pendingka aku, lalu saut aku enggau jampat, lebuh aku ngangau!

    SautPendingka sampi aku, O TUHAN, lalu dingaka sabak aku ke minta tulung.

    Ke Dua
    Semua bansa deka nangika TUHAN. 
    Semua raja di dunya deka nangika kuasa Iya.
    Lebuh TUHAN ngaga Sion baru, 
    Iya deka mandangka pemesai kuasa Iya.
    Iya deka ningaka bala nembiak Iya ti udah ditinggalka Iya, 
    lalu mendingka sampi sida.

    SautPendingka sampi aku, O TUHAN, lalu dingaka sabak aku ke minta tulung.

    Ke Tiga
    Tuliska utai ti udah dikereja TUHAN ke rebak ti dudi, 
    ngambika orang ke apin ada diatu, deka muji Iya.
    TUHAN nilik ke baruh ari endur Iya ti kudus ba endur ti tinggi, 
    Iya nilik ke baruh ari serega ngagai dunya.
    Iya ninga demuh orang jil 
    lalu ngelepaska orang ke kena ukum bunuh.

    SautPendingka sampi aku, O TUHAN, lalu dingaka sabak aku ke minta tulung.

    Aklamasi sebedau Injil (peda Esekiel 33: 11):

    Jaku Allah Taala nya benih, lalu Kristus nya penabur benih;
    semua orang ti datai ngagai Iya deka idup belama iya.

    Bacha Injil: John 8: 21 - 30

    Jesus lalu bejaku baru ngagai sida orang Parisi, “Aku deka mupuk, lalu kita deka ngiga Aku, tang kita deka mati dalam dosa kita. Kita enda ulih datai ngagai endur ti deka digagai Aku.”

    Bala tuai orang Judah lalu bejaku, “Kati Iya deka munuh Diri? Kati nya kebuah Iya nyebut, ‘Endur ti deka digagai Aku, enda ulih digagai kita?.’”

    Ku Iya bejaku ngagai sida, “Kita datai ari baruh, Aku datai ari atas. Kita endang orang dunya, Aku ukai orang dunya. Aku udah madahka kita deka mati dalam dosa kita, laban kita deka mati dalam dosa kita enti kita enda arapka ‘Aku tu meh Aku.’

    Ku sida bejaku ngagai Iya, “Sapa Nuan?” Jesus lalu nyaut, “Orang ke udah dipadahka Aku ngagai kita kenyau ari pun.

    Aku mayuh utai ti deka disebut pasal kita, mayuh utai ti deka diukum. 

    Tang Iya ke ngirumka Aku endang tau dikarapka, lalu Aku madah ngagai dunya utai ti udah didinga Aku ari Iya.”

    Sida enda nemu Iya bejakuka pasal Apai ngagai sida.

    Nya alai ku Iya bejaku, “Lebuh kita udah nuatka Anak Mensia, nya baru kita deka nemu Aku tu meh Iya, lalu nemu Aku ukai ngereja utai nitihka peneka Aku Empu, tang semina bejaku nitihka ajar Apai. Lalu Iya ke ngirumka Aku bisi enggau Aku. Iya nadai kala ninggalka Aku keDiri, laban Aku seruran ngereja utai ti ngerinduka ati Iya.”

    Lebuh Iya nyebut utai nya, mayuh orang arapka Iya.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads