Dua iku baya ngayanka diri, semak penyangkai feri
Cari Berita

Advertisement

Dua iku baya ngayanka diri, semak penyangkai feri

Chief Editor | Berita Iban MY
April 21, 2019

APU NEH: dua iku baya berekak semak penyangkai feri nya.

MUKAH: Sekeda ari orang ti nganti feri, tegepang ati pengudah meda dua iku baya ngayanka diri semak penyangkai feri nya, kilah ensanus.

Nitihka penerang, orang ti ngena feri, Aziz Julaihi, 44 taun, sebedau tu, sida mega suah meda baya ngayanka ba mua ai nya kelebih agi maya ai pasang.

Ku Aziz, urung pemanjai lima meter baya ti dipeda nyipat ai lalu beranyut ke ulu sungai enggau nengelamka diri pengudah feri ngerambing tebing ba sungai nya.

“Baya suah amat ngayanka diri besemak enggau feri ti dikena peranak menua tu ngelayang Batang Igan ti deka ngelawa menua Matu tauka Mukah.

“Baka nya mega baya ke dipeda kami kemari, tang sekali tu bisi dua iku sereta besai amat. Ngasuh bala kami ditu begau enggau tegepang ati,” ku iya lebuh dirandau pengarang berita.

Ku Aziz, raban berikan menua nya mega irauka pengelikun diri lebuh ngiga jeriki ba palan nya laban baya nya dipeda baka mangah amat.

“Kami orang asal menua tu mega suah meda baya ti bebesai ngeradai diri ba tebing sungai maya ai surut.

“Baya ti suah ngayanka diri besemak feri nya ukai pekara ti baru nyadi ba menua kami ditu. Kelimpah ari nya, baya nya baka ke enda nangika mensia.

“Nya alai aku ngansak raban ti bekuasa bekaul bejalaika pengawa matau ngambika ulih nyeliahka sebarang penusah enda disadang nyadi,” tandu iya enggau silik agi.