Header Ads

  • Baru Nyadi

    Dua menyadi eksiden, siku parai, siku selamat

    KASIH AMAT: Menyadi biak (mansa) diripotka benung gali enggau menyadi tuai iya duduk ba palan eksiden ke nyadi.

    SERIAN: Siku lelaki bebadi nyawa, tang menyadi tuai iya (abang) diripotka selamat pengudah motosikal ke ditepan seduai iya eksiden ba Batu 27, di Jalai Lama Kuching-Serian, ditu, sehari tu tadi.

    Lebuh penusah nyadi urung jam 11.15 pagi tadi, lelaki ke bebadi nyawa nya dikelala ngena nama Mohd Jap Junaidi, 22 taun, orang ari Kampung Lintang Baru, Serian.

    Ketuai Opis Tasat enggau Penguasa Trafik Sarawak, Supt Alexson Naga Chabu,  madahka sebedau eksiden nyadi, seduai dua menyadi nya benung dirantau jalai ari Pasar Tapah nuju ke Kampung Panchor Dayak, ditu.

    Tang taja pia, ku iya, lebuh datai ba palan eksiden ke nyadi, motosikal ke ditepan seduai iya enda memukai enda ulih dijaga lebuh nengah jalai betiku enggau ngejung ke seduai iya labuh ba atas jalai alun.


    “Pemalat eksiden nya ngejung ke menyadi biak (mansa) balat bakal ba pala, tang menyadi tuai iya (abang) semina bakal mimit ba kaki sepiak kanan iya,” ku iya lebuh ke dirandau pengarang berita, sehari tu tadi.

    Alexson ngelansa, raban perubat ke bisi datai ngesah ke palan eksiden ke nyadi madahka mansa enda ulih diselamatka agi tauka udah nadai.

    Ku iya, bangkai mansa pengudah nya dianjung ke Sepital Serian kena bejalaika pengawa buntas tasat.

    “Kes nya dipansik ari baruh Seksyen 41 (1) Akta Pengangkutan Jalan 1987,” tandu iya.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads