Ketegal berebut endur ngumpul buah sawit, siku lelaki ngachuk perut menyadi iya ngena perengka tajam
Cari Berita

Advertisement

Ketegal berebut endur ngumpul buah sawit, siku lelaki ngachuk perut menyadi iya ngena perengka tajam

Chief Editor | Berita Iban MY
April 28, 2019

KEMPANG AMAT ATI: Raban polis diatu benung ngiga saspek (gambar ba atas tu), Riswan Jumaseng, 20 taun, ti sama kereja nyadi ngumpul buah kelapa sawit.

SIBU: Semina ketegal berebut endur ngumpul buah sawit, siku lelaki orang Indon kempang ati ngachuk perut menyadi tuai iya ngena perengka tajam ba sebuah ladang sawit di Sungai Pasai Siong, ditu, kemari.

Ketuai Polis Pampang Sibu, ACP Stanley Jonathan Ringgit, madahka lelaki ti bebadi nyawa nya (mansa) dikelala ngena nama Irwan Maseng, 31 taun, kereja nyadi ngumpul buah kelapa sawit ditemu mandur benung tegali lebuh iya meresa ba ladang nya urung jam 10 pagi, kemari.

"Lebuh penusah nyadi, tubuh Irwan ditemu benung gali, pansut gelung perut enggau dipangku dua bakih iya. Nangkan ke nya, orang ke meda penusah ke nyadi (saksi), lalu nganggauka bala pemesai ba ladang nya laban deka nginjau kerita kena nganjung Irwan ke sepital.

"Ku saksi, Irwan belaya enggau menyadi tuai iya ketegal berebut endur ngumpul buah sawit," ku iya lebuh ke dirandau pengarang berita, sehari tu tadi.

Ku Stanley, sepengudah nerima ripot bekaul enggau penusah ke nyadi, seraban polis ari Opis Tasat Jenayah (JSJ) berumban ngesah ke palan penusah ke nyadi, tang saspek udah ngelarika diri ngena mutusikal.


Ku iya, asil pansik tumu, penusah nya nyadi urung penyauh dua kilometer ari kuarters staf ti kereja dia.

"Irwan diperubatka ba wad Unit Rawatan Rapi (ICU) enggau diatu udah berinsur manah pengudah operate," ku iya.

Ku Stanley, kes nya dipansik ari baruh Seksyen 326 Kanun Keseksaan enggau polis diatu benung ngiga menyadi Irwan (saspek), Riswan Jumaseng, 20 taun, ti sama kereja nyadi ngumpul buah kelapa sawit.

"Orang mayuh ti bisi tepedaka saspek tauka nemu nemu dini endur iya tau ngaga ripot ngagai balai polis ke semak," tandu iya.