Rumah panjai TR Umpang angus, 161 orang semina tinggal gari ba tubuh
Cari Berita

Advertisement

Rumah panjai TR Umpang angus, 161 orang semina tinggal gari ba tubuh

Chief Editor | Berita Iban MY
April 19, 2019

AMBIS LENGIS: Pendiau ba palan penusah kenyadi.

SELANGAU: Urung penyampau 161 orang semina tinggal gari ba tubuh pengudah rumah panjai Tuai Rumah Umpang, Ulu Bauh, Celon, pemanjai 25 pintu ke diuan sida iya angus, malam tadi (Hari Empat).

Pengari Operasyen Bomba enggau Penyelamat Malaysia (JBPM) Sarawak, madahka 11 raban bomba, diuluka PKPgB Alimat Sam enggau PBK II Mclean C Madis ari Balai Bomba Sg Merah berumban ngesah ke palan penusah ke nyadi pengudah nerima ripot urung jam 9.59 malam.


"Ketuai BBP PKPgB Alimat Sam ngeripotka rumah panjai nya udah angus lengis diempa api," ku iya lebuh ke dirandau pengarang berita, sehari tu tadi.


Ku iya, raban bomba bisi penanggul lebuh deka tama ke palan penusah ke nyadi laban jalai kelalu mit enggau ngejung ke entuka bomba tusah ka tama kia.


"Nangkan ke nya, raban bomba ngatung pam enggau perengka guna ke dikena madamka api ke dalam kerita Hilux enggau nepan kerita nya urung penyauh lima kilometer nengah jalai tanah ti mit sebedau datai palan penusah ke nyadi," tandu iya.


Lebuh datai ba palan penusah ke nyadi, operasyen madamka api lalu dipejalaika ngena ai sungai ti semak palan penusah ke nyadi enggau nyentuk ke api padam.


Puji Tuhan, nadai orang bakal tauka penusah bebadi nyawa diripotka ba palan penusah ke nyadi enggau operasyen diketuka urung 3.05 pagi.


Tiong Ling Hii

Berebak enggau nya, Sapit Direktor Operasyen JBPM Sarawak, Tiong Ling Hii, madahka rumah panjai Tuai Rumah Umpang nya ke lumur tiga udah angus ba dalam kandang lima hari tu.

"Dalam timpuh lima hari, tiga rumah panjai angus, 89 pintu angus lengis diempa api, 798 orang nadai palan endur ngenduh, siku parai retung enggau dua iku betu," ku iya.



Lebuh penusah angus nyadi ba rumah panjai Tr Chandi.

14 April 2019, Rh Chandi di Sg Tau Selangau angus lengis diempa api. Penusah angus nya udah ngejungka siku indu OKU parai ba palan penusah ke nyadi enggau 230 orang nadai palan endur ngenduh.

Berita silik ulih dibacha nuan ba ditu: http://bit.ly/2XqFlXU


Lebuh penusah angus nyadi ba rumah panajia di Uma Bawang.

15 April 2019, urung 407 orang nadai palan endur ngenduh mega, pengudah dua blok rumah panjai di Uma Bawang, Sg Asap angus lengis diempa api.

Berita silik ulih dibacha nuan ba ditu: http://bit.ly/2IIcYAq

Nyadi semua empat kes penusah rumah panjai dirikod taun tu enggau keterubah sekali nyadi di Betong, kena 15 Januari 2019.


Taja pia, penusah angus nya semina nganguska sepintu rumah aja enggau 20 pintu agi sempat dipadamka sida serumah.