Siku lelaki bebadi nyawa, kena tinggang kayu
Cari Berita

Advertisement

Siku lelaki bebadi nyawa, kena tinggang kayu

Chief Editor | Berita Iban MY
April 20, 2019

KASIH AMAT: Lelaki nya diripotka parai ba palan penusah ke nyadi pengudah kena tinggang kayu ba dada.

SARIKEI: Siku lelaki (deriba kren) bebadi nyawa pengudah kena tinggang kayu ba dada ba sebuah kilang kayu di Selalang, urung jam 4.30 lemai, kemari, Hari Lima.

Lelaki nya (mansa), Akau Pilang, 46 taun, orang ari Kanowit, diripotka parai ba endur penuduk deriba kren ke ditepan iya.

Ketuai Polis Pampang (KPD) Sarikei, Superintenden Awang Arfian Awang Bujang, madahka bisi nerima ripot bekaul enggau siku lelaki parai pengudah kena tinggang kayu ba dada.

"Lebuh penusah nyadi, lelaki nya benung mindahka kayu balak ari tongkang laban deka diproses ba kilang nya.

"Tang taja pia, lebuh lelaki nya benung gawa mindahka lumpung kayu, enda memukai sebatang kayu ti benung dikatung iya nya melurut lalu labuh nuju iya ti benung duduk ba endur penuduk kren ke ditepan iya nya.


"Lelaki nya enda sempat nyeliahka diri ari kena tinggang kayu balak nya enggau ngejung ke iya parai ba palan penusah ke nyadi, pengudah kena tinggang kayu nya ba dada," ku iya lebuh ke dirandau pengarang berita, sehari tu tadi.

Bangkai lelaki nya dianjung ke Sepital Sarikei enggau asil peresa silik, lelaki nya parai ketegal balat bakal ba dada.

Berebak enggau nya, bala ke sepintu bilik enggau lelaki nya ngaga ripot polis di Balai Polis Jakar.

"Kebuah penusah nya nyadi dipechayaka bepun ari tali kren nya putus.

Kes nya ditukuka  nyadi eksiden ba palan kereja.