Siku lelaki bebadi nyawa, ngelantak kayu di Jalai Tanjung Kidurong
Cari Berita

Advertisement

Siku lelaki bebadi nyawa, ngelantak kayu di Jalai Tanjung Kidurong

Staf @beritaibanMY
Monday, April 15, 2019

KASIH AMAT: Mansa (gambar mit) diripotka ngapuska seput kepenudi ba palan eksiden ke nyadi ketegal balat bakal ba pala enggau tubuh.

BINTULU: Siku lelaki bebadi nyawa pengudah kerita ke ditepan iya ngelantak kayu di Jalai Tanjung Kidurong, ditu, tumu pagi kemari.

Lelaki (mansa) dikelala ngena nama Duncan Anak Kuching, 49 taun, diripotka ngapuska seput kepenudi ba palan eksiden ke nyadi ketegal balat bakal ba pala enggau tubuh.

Ketuai Opis Tasat enggau Penguasa Trafik Sarawak, Superintendan Alexson Naga Chabu, madahka bisi nerima ripot bekaul enggau eksiden ke nyadi urung jam 3.45 pagi.

Ku iya, eksiden nya nyadi bepun ari kerita PERODUA Alza ke ditepan mansa enda memukai enda ulih jaga enggau ngejungka tepawah sebedau ngelantak kayu ba tisi jalai.

Ku Alexson, pemalat eksiden nya ngejungka mansa, orang ari Rumah Panjai Rantai, Nanga Lirai, Balingian mengkang ba penuduk kerita ke ditepan iya.

“Raban bomba ngambi awak urung pengelama 15 minit kena mansutka mansa ti mengkang ba kerita nya.

“Asil peresa silik raban paramedik EMRS ke bisi ngesah ke palan eksiden ke nyadi madahka mansa udah enda ulih diselamatka agi tauka udah nadai ketegal balat bakal ba pala enggau tubuh,” ku iya lebuh ke dirandau pengarang berita, kemari.

Kes nya dipansik ari baruh Seksyen 41(1) Akta Pengangkutan Jalan (APJ) 1987.