Siku lelaki ditan polis, mukut, numpu, nikau bini iya ngena 'barbell'
Cari Berita

Advertisement

Siku lelaki ditan polis, mukut, numpu, nikau bini iya ngena 'barbell'

Chief Editor | Berita Iban MY
April 18, 2019

KEMPANG AMAT ATI: Perengka ke dikena lelaki nya (saspek) nikau bini iya (mansa).

LAHAD DATU: Siku lelaki ditan polis pengudah mukut, numpu enggau nikau bini iya ngena besi angkat berat (barbell) di Kampung Tabanak, kemari.

Lelaki nya (saspek), 36 taun, udah nikah tujuh kali nya ditan polis enggau barbell urung jam 10.45 malam.

Ketuai Polis Pampang Lahad Datu, Asisten Komisioner Nasri Mansor, madahka tu kedua kali lelaki nya nyamah bini iya (mansa), 26 taun.

“Keterubah sekali nyadi kena Hari Minggu tu tadi, lelaki nya nyamah bini enggau anak iya. Maya nya mega, lelaki nya nikauka barbell nuju bini iya.

“Pengudah penusah nya nyadi, bini iya kembai ba tubuh enggau kaki tang anak iya telih ba rusuk enggau kaki,” ku iya lebuh ke dirandau pengarang berita, sehari tu tadi.

Ku iya, urung jam 7 lemai, kemari, lelaki nya ukai semina ngeransi aja tang iya mega meri jaku kamah.

“Berebak enggau nya, bini enggau anak iya (mansa) ngelarika diri enggau ngaga ripot polis laban irauka pengelikun seduai menyanak.

“Pengudah nerima ripot ari indu nya, polis mujur nangkap saspek enggau ngerampas perengka ke dikena iya nyamah tauka ngemedis bini enggau anak iya ba rumah sida iya.

“Lelaki nya (saspek) enggau perengka ke dirampas dibaie ke Balsi Polis Pampang (IPD) Lahad Datu kena bejalaika pengawa nasat,” ku iya.

Ku Nasri, asil pansik silik, indu nya (mansa) bini saspek ke lumur tujuh enggau saspek nya laki ke lumur dua indu nya.

“Sebedau tu, indu nya ngaku laki iya nya kala nyamah iya tang enda diripotka ngagai polis.

“Kes nya deka ditasat ari baruh Seksyen 324 Kanun Keseksaan,” ku iya.