Siku lelaki ditemu parai begitang ba langkau kebun di Kampung Melaban
Cari Berita

Advertisement

Siku lelaki ditemu parai begitang ba langkau kebun di Kampung Melaban

Chief Editor | Berita Iban MY
April 9, 2019

Bangkai mansa ditemu begitang ba langkau kebun.

KOTA SAMARAHAN: Siku lelaki ditemu parai begitang ba langkau kebun di Kampung Melaban, ditu, sehari tu tadi.

Bangkai lelaki nya dikelala ngena nama Henderick Ugil, 33 taun, orang Sri Aman, ditemu menyadi biak iya urung jam 6 pagi pengudah meda motosikal Honda Wave ke diempu mansa paking ba tisi jalai.

Ketuai Polis Pampang Kota Samarahan, Deputi Superintendan Lee Chong Chern, madahka menyadi mansa berumban tama ke babas enggau tepedaka mansa benung begitang. Nangkan ke nya, menyadi mansa lalu berumban netak tali ti ditanchang ba rekung enggau ngalika mansa ba tanah.

“Menyadi iya meda darah pansut ari idung mansa, menyadi mansa lalu mai sida sebilik ngiga mansa kenyau ari jam 4 pagi enggau bini mansa bisi mega enggau nurun ngiga mansa.

“Bini mansa mega bisi macha surat ke dipechayaka ditulis mansa ngena jari iya empu enggau surat nya ditemu ba dalam kantung sandik ke dibai mansa,” ku iya lebuh ke dirandau pengarang berita, sehari tu tadi.

Ku iya, asil pansik tumu, bini mansa beumur 31 taun, madahka laki iya (mansa) pansut urung jam 12.30 tengah hari kemari ari rumah suwa seduai iya di Taman Desa Ilmu.

“Pengudah madahka indai bekaul enggau pekara ke nyadi, iya nguji  nanggauka mansa ngena WhatsApp tang enda saut mansa enggau mesej pan enda dibalas mansa.

“Ketegal irau sereta enda lantang ati, bini mansa nanyaka kini penungga mansa ba bala bakih mansa tang semua sida iya nadai nemu dini endur mansa.

“Urung jam 4 pagi tadi, bini mansa enggau bala ke sebilik pansut ngiga mansa ngena kerita ba pelilih Stakan enggau Batu 7 tang nadai ga tetemuka mansa,” ku iya.

Ku iya, berindik ari nya, sida iya sebilik mutus ati deka ngiga mansa ba  Kampung Melaban sebedau tetemuka mansa benung begitang.

“Asil peresa ba tubuh mansa, nadai bedau belibat tauka jenayah palan penusah ke nyadi, tang semina bisi bekau tali ba rekung mansa.

“Perengka guna ke diempu mansa mega agi bisi ba tubuh iya,” ku iya.

Ku iya, bangkai mansa dianjung ke bilik bangkai Sepital Besai Sarawak (HUS) kena bejalaika pengawa buntas tasat enggau kes nya dituku nyadi parai ngenyit.

Nitihka penerang ke diterima beritaibanMY, mansa udah enam bulan nadai nurun gawa, sebedau tu mansa gawa ke tasik enggau kompeni luar negara.