Siku polis bakal, nangkap siku lelaki dipechayaka nyerungkai rumah di Sibu
Cari Berita

Advertisement


Siku polis bakal, nangkap siku lelaki dipechayaka nyerungkai rumah di Sibu

Staf @beritaibanMY
April 27, 2019

SEPI ASAI: Lelaki (saspek) ti dipechayaka bekait enggau kes nyerungkai rumah mujur ditangkap raban polis.

SIBU: Siku ari raban polis bakal lebuh nangkap siku lelaki ti dipechayaka bekait enggau kes nyerungkai rumah di Lorong Sentosa Barat, kemari.

Sapit Ketuai Polis Pampang Sibu, Superintendan Martin Koo, madahka penusah nyadi urung jam 2.30 lemai nya, polis (mansa) ti beumur 32 taun bakal endur gelang jari sepiak kanan lebuh iya nguji nangkap siku lelaki (saspek).

Ku iya, lelaki nya nguji ngelarika diri pengudah sida iya madahka diri ari Opis Tasat Jenayah (JSJ) Ibu Pejabat Polis Daerah (IPD) Sibu enggau raban Khas Lanang.

"Nangkan ke nya, lelaki ti beumur 23 taun nya, enda memukai lalu belandak ke belakang rumah tang enda sempat ngelarika diri.

"Tang taja pia, lelaki nya ngelingkang lebuh raban polis nya nguji nangkap lelaki nya enggau ngejungka siku ari raban kami bakal," ku iya lebuh ke dirandau pengarang berita, sehari tu tadi.

Ku iya, lelaki nya mujur ditangkap enggau siku polis ti bakal nya dianjung ke Sepital Sibu ngambika ulih diperubatka silik agi.

"Lebuh lelaki nya ngelingkang, raban polis pan nyau beigar-igar ngenan ke lelaki nya ngambika enda ulih lari," ku iya.

Kes nya diatu dipansik ari baruh Seksyen 186 Kanun Keseksaan enti ditukuka salah ulih kena ukum jil maksimum dua taun tauka ukum mata duit maksimum RM10,000 tauka kededua nya sekali.