12 May 2019 - Hari Minggu Ke-empat Musim Paska
Cari Berita

Advertisement


12 May 2019 - Hari Minggu Ke-empat Musim Paska

Staf @beritaibanMY
May 12, 2019

Graphik: pxhere

Bacha Ke Satu: Surat Pasal Kereja Rasul 13: 14, 43 - 52

Paul seduai Barnabas majakka pejalai ari Perga lalu datai di Antiok di menua Pisidia.

Lalu lebuh hari Sabat, seduai iya tama ngagai balai gempuru, lalu duduk.

Lebuh orang mayuh udah mupuk ari balai gempuru nya, mayuh orang Judah, enggau orang bansa bukai ke angkunka Allah Taala sereta udah masuk pengarap orang Judah, nitihka Paul seduai Barnabas, lalu seduai iya meransang sida majak tetap ati idup dalam pengasih Allah Taala.

Lebuh hari Sabat ti nangkanka nya, nyauka semua orang ke dalam nengeri nya datai mendingka jaku Tuhan.

Tang lebuh orang Judah meda pemayuh orang, sida kepapas. Sida lalu ngelese sereta nyakal jaku Paul.

Paul seduai Barnabas bejaku enggau berani.

Ku seduai iya, “Jaku Allah Taala endang enda tau enda disebut dulu ngagai kita.

Tang laban kita nulak jaku nya, lalu kita ngira diri enda patut nerima pengidup ti meruan belama iya, kami diatu deka nguingka diri ngagai orang bansa bukai.

Laban tu pesan ti udah diberi Tuhan ngagai kami, ‘Aku udah ngaga seduai nyadi penampak ke orang bansa bukai, ngambika seduai mai pengelepas nyentuk ngagai ujung dunya.’”

Lebuh orang bansa bukai ninga nya, sida gaga ati, lalu muji jaku Allah Taala, lalu sida ke udah dipilih nerima pengidup ti meruan belama iya, arap.

Jaku Tuhan lalu ngelekai ngagai semua endur di menua nya.

Tang orang Judah ngeruga ati orang indu ke tinggi pangkat ke angkunka Allah Taala, enggau sida lelaki ke tinggi pangkat di nengeri nya, lalu nyungkak sida merinsaka Paul seduai Barnabas, lalu muru seduai iya ari menua sida.

Nya alai Paul seduai Barnabas nesai abus ari kaki seduai iya, kena ngelaban sida, lalu mupuk ngagai Ikonium.

Sida murid lalu gaga amat ati, sereta penuh laban Roh Kudus.

Masmur Entara: Masmur 100: 1 - 2, 3, 5

Saut (peda 3c): Kitai tu nembiak Iya, kitai tu raban domba Iya.

Ke Satu
Nyanyi gaga ati ke TUHAN meh semua kita dunya!
Sembah meh TUHAN enggau ati ti gaga,
datai ngagai Iya enggau lagu lantang ati!

SautKitai tu nembiak Iya, kitai tu raban domba Iya.

Ke Dua
Anang enda ngaku TUHAN nya Allah Taala!
Iya ngaga kitai, lalu kitai endang enggi Iya.
Kitai tu nembiak Iya, kitai tu raban domba Iya.

SautKitai tu nembiak Iya, kitai tu raban domba Iya.

Ke Tiga
TUHAN endang badas.
Pengerindu Iya meruan belama iya,
lalu penetap ati Iya meruan belama iya.

SautKitai tu nembiak Iya, kitai tu raban domba Iya.

Bacha Ke Dua: Pemandang 7: 9, 14B - 17

Udah nya aku, John, malik lalu tepedaka mayuh amat orang, datai ke sida nyau enda ulih diitung.

Sida nya datai ari genap bengkah bansa, ari semua raban bansa, menua, enggau jaku, lalu sida bediri di mua kerusi diraja enggau di mua Anak Domba.

Sida ngena baju panjai ti burak, lalu sida megai dan engkerema ba jari sida.

Siku ari bala tuai lalu bejaku ngagai aku, “Tu meh bala orang ke udah pansut ari penusah ti besai. Sida udah masu baju panjai sida, lalu ngaga baju nya burak ngena darah Anak Domba.

“Nya kebuah sida bediri di mua kerusi diraja Allah Taala lalu nyembah Iya siang malam dalam Rumah Sembiang Iya; Lalu Iya ke duduk ba kerusi diraja nya deka nyaga sida.

Sida enda agi lapar tauka aus, lalu mata hari enggau pengangat mata hari nadai agi manchar ngagai sida, laban Anak Domba, ke ba tengah-tengah kerusi diraja nya deka nyadi Pengibun sida, lalu Iya deka ngiring sida ngagai mata ai ti idup.

Lalu Allah Taala deka ngendas semua ai mata ari mata sida.”

Alleluia (peda John 10: 14)

Alleluia, alleluia.
Aku tu pengibun bedus ti badas, ku TUHAN.
Aku ngelala bedus Aku, lalu bedus Aku ngelala Aku.
Alleluia.

Bacha Injil: John 10: 27 - 30

Ku Jesus: “Bedus Aku mendingka nyawa Aku.

Aku ngelala sida, lalu sida nitihka Aku.

Aku meri sida pengidup ti meruan belama iya, lalu sida enda mati. Nadai orang ulih ngerampas sida ari jari Aku.

Utai ti udah diberi Apai ngagai Aku besai agi ari semua utai bukai, lalu nadai orang ulih ngerampas sida ari jari Apai.

Kami Duai Apai endang siku.”