14 May 2019 - Hari Dua ba Minggu Ke-empat Musim Paska
Cari Berita

Advertisement


14 May 2019 - Hari Dua ba Minggu Ke-empat Musim Paska

Staf @beritaibanMY
May 14, 2019

14 May 2019 - Hari Dua ba Minggu Ke-empat Musim Paska (Feast of Saint Matthias, Apostle)

Bacha Ke Satu: Surat Pasal Kereja Rasul 1: 15 - 17, 20 - 26

Lebuh maya nya Peter lalu bediri ba tengah-tengah bala sida ke arap (pemayuh semua sida kira seratus dua puluh iku) lalu bejaku,

“Menyadi, Bup Kudus enda tau enda dikamatka, ba senentang Roh Kudus ke bejaku ngena mulut David, pasal Judas ke nyadi malin ke orang ke nangkap Jesus, laban iya udah nyadi raban kitai, lalu udah diberi ungkup dalam pengawa tu.

Laban endang udah ditulis dalam bup Masmur,

‘Awakka rumah iya puang, lalu awakka orang nadai diau dalam rumah nya.’ Lalu udah mega ditulis munyi tu:

‘Awakka orang bukai ngambi pengawa iya.’

Nya alai, siku orang enda tau enda enggau kitai besaksika pasal pengangkat Tuhan Jesus ari mati.

Orang nya enda tau enda siku ari raban kitai ke seruran enggau kitai sekumbang kitai ke bejalai kia-kia enggau Tuhan Jesus, berengkah ari maya John ke maptisa orang, nyentuk ngagai Hari Tuhan Jesus diambi ari kitai lalu dibai niki ke serega.”

Nya alai sida lalu nuduhka dua iku orang: Josep, ke dikumbai Barsabas (ke mega dikumbai Justus), enggau Matias.

Sida lalu besampi, ku sida, “Tuhan, Nuan nemu ati semua orang. Tunjukka ngagai kami ni bagi seduai tu ke udah dipilih Nuan bekereja dalam pengawa tu nyadi rasul nganti Judas, ke udah limpang lalu mupuk ngagai endur iya empu.”

Sida lalu bechabut undi ke seduai iya, lalu Matias kena pilih.

Iya lalu ditambahka ngagai bala rasul ke sebelas iku nya.

Masmur Entara: Masmor 113: 1 - 2, 3 - 4, 5 - 6, 7 - 8

Saut (peda 8): TUHAN deka meri iya penuduk begulai enggau bala raja ke megai nembiak Iya.

Ke Satu
Puji TUHAN! Kita ke nembiak TUHAN,
puji meh nama Iya!
Puji meh nama TUHAN
kenyau ari diatu datai ke belama iya.

SautTUHAN deka meri iya penuduk begulai enggau bala raja ke megai nembiak Iya.

Ke Dua
Ari timur nyentuk ke barat
puji meh nama TUHAN!
TUHAN merintah semua bansa,
mulia Iya tinggi agi ari langit.

SautTUHAN deka meri iya penuduk begulai enggau bala raja ke megai nembiak Iya.

Ke Tiga
Nadai orang sebaka enggau TUHAN Allah Taala kitai.
Iya diau ba endur ti tinggi di atas,
tang Iya nilik ke baruh deka meda langit enggau dunya.

SautTUHAN deka meri iya penuduk begulai enggau bala raja ke megai nembiak Iya.

Ke Empat
Iya ngasuh orang ke seranta diau lantang.
Iya ngelepaska orang ke suntuk ari pemerinsa sida
lalu ngasuh sida duduk begulai enggau bala raja,
bala raja ke megai nembiak Iya.

SautTUHAN deka meri iya penuduk begulai enggau bala raja ke megai nembiak Iya.

Alleluia (peda John 15: 16)

Alleluia, alleluia
Aku ke milih kita ari dunya,
lalu ngasuh kita bejalai lalu bebuah lebat, buah ti tan, ku TUHAN.
Alleluia.

Bacha Injil: John 15: 9 - 17

Ku Jesus bejaku ngagai sida murid Iya:

“Baka Apai ke udah rinduka Aku, baka nya mega Aku udah rinduka kita. Meruan dalam pengerindu Aku.

Enti kita ngasika pesan Aku, kita deka meruan dalam pengerindu Aku, baka Aku ke udah ngasika pesan Apai, lalu meruan dalam pengerindu Iya.

Aku udah madahka utai tu ngagai kita, ngambika pengaga Aku bisi dalam kita, ngambika ati kita chukup gaga.

Tu pesan Aku: rinduka pangan diri, baka Aku ke udah rinduka kita.

Nadai orang ngembuan pengerindu ti besai agi ari tu, datai ke iya nyerahka nyawa diri ke pangan iya.

Kita pangan Aku enti kita ngasika pesan Aku.

Aku enda agi ngumbai kita ulun, laban ulun enda nemu utai ti dikereja tuan iya. Tang Aku udah ngumbai kita pangan, laban Aku udah madah ngagai kita semua utai ti didinga Aku ari Apai.

Ukai kita ke milih Aku, tang Aku ke milih kita, lalu ngasuh kita bejalai lalu bebuah lebat, buah ti tan.

Nya baru Apai deka meri ngagai kita sebarang utai ti dipinta kita ari Iya dalam nama Aku.

Tu pesan ti diberi Aku ngagai kita: rinduka pangan diri.