HUS ngiga orang ti ngelala pesakit benama Lisa Anak Alim
Cari Berita

Advertisement


HUS ngiga orang ti ngelala pesakit benama Lisa Anak Alim

Staf @beritaibanMY
May 8, 2019

Lisa Anak Alim

KUCHING: Sepital Besai Sarawak (HUS) minta bantu ari orang mayuh ngiga bala ke sebilik tauka kaban belayan ti ngelala siku pesakit indu ti benung diperubatka ba Wad Gynae, di Sepital Besai Sarawak, ditu.

Nitihka penerang ke diterima @beritaibanMY ari Sepital Besai Sarawak, pesakit nya dikelala ngena nama Lisa Anak Alim, ti beumur dipelabaka 37 taun, agi dara, bangsa Iban enggau nadai ngembuan dokumen pengelala diri.

Ku pengari Sepital Besai Sarawak, indu nya dianjung ke Sepital Besai Sarawak pengudah iya dipechayaka pedis perut enggau belakang di Kuching Central Market.

"Pesakit nya madah, iya orang asal ari Kampung Pasir Ulu, Lundu enggau diau di Kuching kenyau ari umur belasan taun laban ke nitihka baka semenua pengudah indai iya midang.

"Pesakit nya mega nadai ngembuan dokumen bekait enggau apai indai iya.

Kelimpah ari, pesakit nya madahka diri nadai kaban belayan.

Ku pengari Sepital Besai Sarawak, pesakit nya mega mayuh macham endur iya kereja nyentuk ke iya kala kereja nyadi kitchen helper di Kuching.

"Naka kediatu, Sepital Besai Sarawak apin bulih penerang silik bekait enggau ke sepintu bilik iya enggau dokumen pengelala iya empu. Raban kami begunaka bendar ke bala ke sepintu bilik enggau iya ngambika kami ulih bejalaika intervensi ngubat pesakit nya enggau silik agi," ku iya lebuh ke dirandau pengarang berita, sehari tu tadi.

Berebak enggau nya, bala pemesai ari Sepital Besai Sarawak minta bantu ari orang mayuh ti ngelala pesakit nya tauka bala ke sepintu bilik enggau iya, enda ngira dini endur. Kita dipinta betalipaun ngagai Pegawai Kerja Sosial Perubatan Sepital Besai Sarawak, Kuching, Puan Nor-Asmawati Mohd Ali, ngena lumur 082-276793 tauka 082-276666 sambung ngagai lumur 4375.



Kami ari @beritaibanMY mega mai semua bala pemacha besaup besadungka artikel tauka berita tu ba media rama Facebook, Instagram enggau WhatsApp ngambika orang ke ditujuka pesan tu ulih nemu pasal berita tu enggau naka pengelengkas. Terima kasih. Tuhan merekat semua.. 😇