Header Ads

  • Baru Nyadi

    Koperal kena timbak ba lengan, dua perumpak mujur ditangkap di Taman Tunku

    Koperal mandangka lengan kiba ti kena timbak (tengah) enggau saspek benung gali (graphik mit kiba enggau kanan) ngetatka abi pengudah kena timbak polis ba kaki kiba.

    MIRI: Siku raban polis bakal ba lengan, tang siku perumpak bakal ba kaki pengudah raban polis enggau tiga saspek betimbal nimbak lebuh kes ngerumpak nyadi ba sebuah rumah di Taman Tunku, ditu, sehari tu tadi.

    Nitihka penerang ke diterima @beritaibanMY ari bini mansa, penusah nyadi urung jam 12:30 tengah hari tadi ba rumah ti diuan iya di Taman Serene Jelita di Taman Tunku, ditu.

    Lebuh iya pulai ke rumah pengudah ngambi anak lelaki iya ti beumur empat taun ari sekula tadika.

    "Aku bisi ninga munyi utai meletup ti inggar ari belakang aku, apin lama pengudah aku nyangkai ke kerita sebedau tama ke rumah.

    "Pengudah aku tekenyit ninga munyi ti inggar nya, aku lalu malik ke belakang enggau meda sebuah kerita ngelantak pagar rumah aku," ku iya lebuh ke dirandau pengarang berita sehari tu tadi.

    "Tiga lelaki (saspek) ngena tuping, mansang semak aku, mai siti pistol pansut ari kerita nya enggau lalu merak aku, ngasuh aku tama ke dalam rumah," ku iya.

    Maya nya mega, laki iya (mansa) enggau amai seduai iya benung bisi ba dalam rumah nya.

    Pengudah tama ke dalam rumah, saspek nya ngasuh sida iya sebilik niki ke tingkat atas sereta nuju ke pistol ba pala laki mansa.

    Ku iya, anak lelaki aku orang ti pemadu rawan ati 'trauma' pengudah mulut anak iya dipampur saspek ngena selutip.

    Tang taja pia, sida sebilik benasit manah laban ngam-ngam ga maya nya mega, bisi sebuah kerita polis benung bejalaika pengawa ngemata ba endur rumah nya enggau bisi meda sebuah kerita BMW chura engkeraju ti ngelantak pagar rumah mansa.

    Berindik ari nya, raban 'polis peronda' nya lalu minta bantu ari 'Bilik Gerakan Miri' urung jam 1.30 tengah hari.

    Pengudah saspek nemu raban polis bisi datai ba luar rumah nya, siku ari saspek lalu ngachitka pistol nuju raban polis enggau kena lengan siku lengan polis ti megai tanggungpengawa koperal

    Nangkan ke nya, raban polis peronda pen malas nimbak nuju ke saspek enggau kena kaki kiba siku saspek laban deka ngenanka diri.

    Ba kes timbak ke sama, jari laki mansa diripotka telih pengudah kena leka seterum ti udah pambal. 

    Dua saspek mujur ditangkap polis ba palan penusah ke nyadi, tang siku da agi dipechayaka sempat ngelarika diri.

    Polis mega ngerampas siti pistol semi auto 'Sig Sauer' ti dipechayaka dikena saspek ba palan penusah ke nyadi.

    Ketuai Polis Pampang Miri, ACP Lim Meng Seah mega bisi datai ba palan penusah ke nyadi. 

    Raban polis ti bakal ba lengan kiba enggau saspek ti kena timbak ba kaki kiba dibaie ke Sepital Miri ngambika ulih diperubatka enggau silik agi.

    Kes nya dipansik ari baruh Seksyen 3 Akta Senjata Api laban udah ngachitka pistol lebuh ngerumpak tauka ngaga jenayah.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads