14 iku lenyau palan endur ngenduh
Cari Berita

Advertisement

14 iku lenyau palan endur ngenduh

Chief Editor | Berita Iban MY
July 30, 2019

KASIH AMAT: Api benung mau ba palan penusah angus ke nyadi.

SARATOK: Urung penyampau 14 iku lenyau palan endur ngenduh pengudah dua buah rumah ti diibun sida iya di Melango, angus diempa api, sehari tu tadi.

Kepala Balai Bomba Saratok, Nazry Mohamat, madahka seraban bomba berumban ngesah ke palan penusah ke nyadi pengudah nerima kanggau ngenyit urung jam 12.10 tengah hari.

Ku iya, asil pansik tumu ba palan penusah nyadi bepun ari ari sebuah bilik panking ba ringkat atas sebuah rumah ti diibun lima iku sepintu bilik.

"Lebuh penusah angus nyadi, siku ari orang ti ngibun rumah nya benung berapi ba dapur di ringkat baruh rumah nya.

"Iya nemu penusah angus nyadi pengudah ninga orang ke berimbai rumah enggau iya besai nyawa (nyerauh).

"Pendiau api ti mau enggau jampat ngejungka iya enda ulih nyelamatka reta tengkira enggau maya nya mega hari benung panas enggau beribut lalu nyelarai ke rumah sepiak," ku iya lebuh ke dirandau pengarang berita, sehari tu tadi.

Ku Nazry, rumah keterubah angus lengis diempa api tang rumah ke lumur dua angus ba ringkat atas.

Rumah ke lumur dua nya diibun sembilan iku sepintu bilik.

Nadai bakal enggau bebadi nyawa diripotka ba palan penusah angus ke nyadi.

Kebuah penusah angus nyadi enggau penyampau pengerugi agi dipansik.