25 July 2019 - Hari Empat ba Minggu ke Enam belas Musim Selama
Cari Berita

Advertisement


25 July 2019 - Hari Empat ba Minggu ke Enam belas Musim Selama

Staf @beritaibanMY
July 25, 2019


25 July 2019 - Hari Empat ba Minggu ke Enambelas Musim Selama (Feast of Saint James, Apostle)

Bacha Ke Satu: 2 Korint 4: 7 - 15

Menyadi:
Tang reta roh nya disimpan dalam periuk tanah kena nunjukka kuasa ti besai nya datai ari Allah Taala, ukai datai ari kami.

Kami dituntung semua macham penusah, tang kami enda alah; beba runding tang enda kelalu tusah; kena perinsa, tang enda ditinggalka; dipalu, tang enda rusak; seruran mai pemati Jesus dalam tubuh kami, ngambika pengidup Jesus mega diayanka ba tubuh kami.

Laban lebuh kami idup, kami endang seruran napi pemati ketegal Jesus, ngambika pengidup Jesus diayanka ba tubuh kami ke tau mati tu.

Nya alai pemati bekereja dalam kami, tang pengidup bekereja dalam kita.

Tang kami bisi roh pengarap baka ti ditulis dalam Bup Kudus, “Aku arap, nya alai aku bejaku.”

Kami mega arap, nya alai kami bejaku, laban kami nemu, Iya ke udah ngangkatka Tuhan Jesus ari mati, deka mega ngangkatka kami ari mati sama enggau Jesus, lalu deka mai kami sama enggau kita, ngagai mua Iya Empu.

Semua utai tu ke penguntung kita, ngambika pengasih ti ngelekai ngagai mayuh agi orang, ngasuh mayuh agi  orang meri sampi terima kasih, kena ngemuliaka Allah Taala.

Masmur Entara: Masmur 126: 1 - 2AB, 2BC - 3, 4 - 5, 6

Saut (5): Awakka orang ke nyabak lebuh sida nanam utai manjung gaga ati lebuh sida ngetau!

Ke Satu
Lebuh TUHAN mai kitai pulai baru ngagai Jerusalem,
utai nya asai ti diambi mimpi!
Bebendar amat kitai ketawa,
bebendar amat kita manjung gaga ati!

Saut: Awakka orang ke nyabak lebuh sida nanam utai manjung gaga ati lebuh sida ngetau!

Ke Dua
Udah nya bansa bukai lalu bejaku,
“TUHAN udah ngereja utai ti besai ke sida.”
TUHAN endang udah ngereja utai ti besai ke kitai.
Nya kebuah kitai gaga!

Saut: Awakka orang ke nyabak lebuh sida nanam utai manjung gaga ati lebuh sida ngetau!

Ke Tiga
TUHAN, asuh kami nyadi kaya-raja baru, O TUHAN,
baka sungai ti rangkai nyau penuh laban ai baru lebuh musin pengujan.
Awakka orang ke nyabak lebuh sida nanam utai
manjung gaga ati lebuh sida ngetau!

Saut: Awakka orang ke nyabak lebuh sida nanam utai manjung gaga ati lebuh sida ngetau!

Ke Empat
Orang ke nyabak lebuh sida mai benih
deka manjung gaga ati lebuh sida pulai ke rumah
mai utai ti diketau sida.

Saut: Awakka orang ke nyabak lebuh sida nanam utai manjung gaga ati lebuh sida ngetau!

Alleluia (peda John 15: 16)

Alleluia, alleluia
Aku ke milih kita ari dunya,
lalu ngasuh kita bebuah lebat, buah ti tan, ku TUHAN.
Alleluia, alleluia.

Bacha Injil: Matthew 20: 20 - 28

Udah nya bini Sebedi datai ngagai Jesus, mai anak lelaki iya ke dua iku.

Iya besugang di mua Jesus, lalu minta Iya ngereja siti utai.

Jesus lalu nanya iya, “Nama utai dipinta nuan?”

Ku bini Sebedi nyaut, “Awakka anak aku dua iku tu duduk muak ari kanan enggau ari kiba Nuan dalam Perintah Nuan.”

Tang ku Jesus nyaut iya, “Kita enda nemu utai ti dipinta kita. Kati seduai ulih ngirup ari mangkuk ti deka diirup Aku?”

Seduai iya lalu nyaut, “Ulih.”

Ku Jesus bejaku ngagai seduai iya, “Seduai deka ngirup ari mangkuk Aku, tang pasal duduk muak ari kanan enggau ari kiba Aku, Aku nadai kuasa ngeletak nya. Penuduk nya udah disediaka Apai Aku ke orang ke bempu kerusi nya.”

Lebuh murid ke sepuluh iku ninga nya, sida lalu pedis ati ngagai seduai menyadi nya.

Tang Jesus ngangauka sida, lalu bejaku, “Kita nemu, orang ke merintah orang bansa bukai, nekanka pengidup orang ke dipegai sida, lalu bala tuai sida merinsaka sida.

“Tang ba kita utai nya enda baka nya. Barang sapa deka nyadi orang ke besai ba bala kita, enda tau enda nyadi kuli semua kita, lalu barang sapa deka nyadi dulu ba bala kita, enda tau enda nyadi ulun kita, baka Anak Mensia ke datai ukai minta Diri dibela, tang laban Iya deka mela, lalu nyerahka nyawa Diri kena nebus orang mayuh.”