Dua minggu ngirup ai sungai aja kena ngidupka diri
Cari Berita

Advertisement


Dua minggu ngirup ai sungai aja kena ngidupka diri

Staf @beritaibanMY
July 26, 2019

GRAPHIK PENGIAS: Siku orang tuai benung ngirup ai.

BINTANGOR: Siku lelaki ke diripotka lenyau dua minggu ti udah lalu pengudah pansut ari rumah iya di Ulu Pakan, Sarikei, ditemu selamat sehari tu tadi.

Pengelenyau Bunjai Sigang, 53 taun, ditemu bala ke sepintu bilik enggau iya pengudah iya pansut kediri ari rumah enggau alu nadai pulai ke rumah kena 11 Julai.

Kepala Bomba Bintangor, Nicholas Belulin, madahka Bunjai ditemu bala sida serumah panjai lebuh sida iya benung bejalai ke kebun lada ti semak rumah Christina Kasun, urung jam 12.30 tengah hari tadi.

“Lebuh ke ditemu, Bunjai dipeda ba ke lemi tulang, benung gali enggau sempat utai empa laban ke lepi. Nangkan ke nya, sida serumah nya lalu nganggauka raban bomba,” ku iya lebuh ke dirandau pengarang berita, sehari tu tadi.

Ku Nicholas, Bunjai dibaie ke Klinik Perintah Pakan ngambika ulih diperesa enggau diperubatka enggau silik agi.

“Naka ke diatu, Bunjai diripotka udah berinsur manah enggau iya semina ngirup ai sungai pengelama dua minggu kena ngidupka seput diri,” ku iya.

Sebedau tu, bala ke sebilik enggau Bunjai bisi ngaga ripot ke Balai Polis Julau sebedau Operasyen Ngiga enggau Nyelamat (SAR) dipejalaika.

Pengelenyau Bunjai dipechayaka ketegal bisi penanggul ba untak (mental) enggau sakit gaut.

“Raban bomba bisi nerima kanggau urung jam 7.55 pagi, 11 Julai sebedau Operasyen SAR dipejalaika.

“Bunjai semina ngena tanchut pandak enggau enda bebaju ba kepenudi sekali meda iya pansut ari rumah.

“Operasyen SAR diketuka kena 19 Julai tu tadi laban nadai tetemuka bekau iya,” ku iya.