Lelaki dipechayaka masung indu OKU udah ditangkap polis
Cari Berita

Advertisement

Lelaki dipechayaka masung indu OKU udah ditangkap polis

Chief Editor | Berita Iban MY
July 25, 2019

SEPI ASAI NUAN: Lelaki nya mujur ditangkap malam tadi.

SERIAN: Siku nembiak lelaki ditangkap polis pengudah dipechayaka masung siku indu Orang Timpang Pendiau (OKU), ngejungka indu nya betubuh bisi sereta ngadaka anak, kemari.

Nembiak lelaki nya, 17 taun, ditangkap polis urung jam 11.10 malam ba rumah ti diuan iya di Serian ditu.

Indai indu nya udah ngaga ripot polis kena 23 Julai tu tadi.

Kepala Polis Pampang Serian, DSP Aswandy Anis, madahka nembiak lelaki nya udah ditangkap enggau nembiak lelaki nya deka ditasat ari baruh 'Seksyen 376 Kanun Keseksaan' laban udah masung indu nya.

"Nembiak lelaki nya nguji ngelarika diri pengudah nemu raban polis benung ngiga iya. Tang taja pia, raban polis mujur nangkap urung jam 11.10 malam tadi," ku iya.

Kena 18 Julai, indu Orang Timpang Pendiau (OKU), 24 taun, mujur ngadaka anak lelaki ba Sepital Besai Sarawak (HUS) taja pan enda kala nikah.

Nangkan ke nya, indai indu nya ngaga ripot polis laban pechaya anak indu iya nya dipasung siku lelaki (orang berimbai rumah) lebuh sida iya nadai di rumah. 

Berebak enggau nya, raban polis bejalaika operasyen ngiga enggau nyidi lelaki nya enggau lelaki nya mujur ditangkap malam tadi. 

Naka kediatu, kes tu agi benung dipansik raban polis.