Polis Padawan ngiga Gilbert Ahnyan
Cari Berita

Advertisement

Polis Padawan ngiga Gilbert Ahnyan

Chief Editor | Berita Iban MY
July 25, 2019

GILBERT AHNYAN: Lelaki ke benung digiga Polis Padawan.

KUCHING: Polis Padawan benung ngiga siku lelaki kena mantu mansik 2 kes bekait enggau ngelakar orang lebuh bejual enggau bebelika kerita.

Sapit Kepala Polis, DSP Merbin Lisa, madahka lelaki nya dikelala ngena nama Gilbert Ahnyan, 37 taun, orang ari Kampung Merang Baru, Jalai Kuching-Serian.

Ku iya, kes keterubah diripotka nyadi kena 12 Mei taun nyin kemari ti ditapi siku indu menua luar (warga asing), 38 taun, maya nya mega lelaki nya madahka diri deka nyual kerita ngagai indu nya.

"Nangkan ke nya, lelaki nya ngasuh indu nya mayar duit deposit penyampau RM8,000 kena ngemuntangka pekara nyual enggau meli kerita. Tang pengudah lelaki nya bulih duit deposit nya iya lalu ngelalaika diri," ku Merbin.

Kes kedua diripotka nyadi ba siku indu, 48 taun, ti ngejungka indu nya napi pengerugi urung penyampau RM3,000, ba bulan Ogos taun nyin kemari.

"Lelaki nya mega ngaga pekara ke sama ianya nyual kerita ngagai indu nya tang pengudah bulih duit  RM3,000 kena mayar kerita nya, iya pan lalu enda temu kini penungga enggau pengudah nya indu ti dikelakar iya lalu ngaga ripot polis," ku iya.

Merbin minta orang mayuh ti ngelala tauka nemu di endur lelaki tu (gambar ba atas artikel tu) tau betalipaun ngagai Pemesai Penyiasat Inspektor Douglas Suai ngena lumur 019-8129892 tauka Sarjan Ranggie ngena lumur 013-8338041.