Siku bebadi nyawa, dua balat bakal, eksiden ba simpang KJD
Cari Berita

Advertisement


Siku bebadi nyawa, dua balat bakal, eksiden ba simpang KJD

Staf @beritaibanMY
July 26, 2019

KASIH AMAT: Raban bomba benung bejalaika operasyen nyelamat ba palan eksiden ke nyadi.

BINTANGOR: Siku lelaki bebadi nyawa, tang dua balat bakal pengudah Hilux ke ditepan sida iya belantak enggau lori ti ngundan minyak di Kilometer 20 Jalai Sarikei - Bintangor, ba semak simpang KJD, ditu, kemari.

Nitihka penerang ke diterima @beritaibanMY, eksiden nyadi urung jam 6.50 lemai enggau lelaki ke badi nyawa nya dikelala ngena nama Bruin Sidu, 41 taun enggau dua iku agi (siku indu enggau siku lagi) diripotka balat bakal.

Pengari Operasyen Bomba Sarawak, madahka sida iya bisi nerima ripot bekaul enggau eksiden ke nyadi enggau seraban bomba berumban ngesah ke palan eksiden ke nyadi ngambika ulih bejalaika operasyen nyelamat.

"Lebuh datai, kepala operasyen ngeripotka 3 orang mengkang ba dalam kerita Hilux.

Ku iya, deriba lori enggau kelindan diripotka selamat tauka nadai nenama.

"Nangkan ke nya, raban bomba pengudah nya lalu berumban ke sida tiga ti mengkang ba dalam kerita nya enggau asil pansik silik, siku lelaki udah nadai tauka enda ulih diselamatka agi, tang dua orang balat bakal," ku iya lebuh ke dirandau pengarang berita sehari tu tadi.

Pengari bomba ngelansa, dua orang ti bakal nya dianjung ke Sepital Sarikei ngambika ulih diperubatka enggau silik agi enggau bangkai lelaki ke deriba nya mega dianjung sama kena bejalaika pengawa buntas tasat.

"Operasyen tembu urung jam 9.18 malam tadi," ku iya.