Siku lelaki bebadi nyawa, motosikal belantak enggau kerita
Cari Berita

Advertisement

Siku lelaki bebadi nyawa, motosikal belantak enggau kerita

Staf @beritaibanMY
July 23, 2019

KASIH AMAT: Pendiau kerita enggau motosikal pengudah eksiden nyadi.

KOTA SAMARAHAN: Siku lelaki bebadi nyawa pengudah motosikal ke ditepan iya belantak enggau sebuah kerita di Jalai Stakan, ditu.

Nitihka penerang ke diterima @beritaibanMY, eksiden nyadi urung jam 8 pagi kemari, lebuh Paul Baren Aymen Pangkuma (mansa), 22 taun, orang ari Taman Phoning, Kuching benung dirantau jalai ari Batu 7 nuju ke Kota Samarahan.

Ketua Polis Pampang Samarahan, Deputi Superintenden Lee Chong Chern, madahka motosikal Paul belantak enggau sebuah kerita Perodua Alza ti ditepan siku indu, Jelina Koden, 37 taun, orang ari Kampung Podam, Bau.

"Hari ujan lebuh eksiden ke nyadi, kededua entukar ke ditepan seduai iya enda ulih dijaga lalu ngejungka belantak enggau tepawah ke tisi jalai," ku iya lebuh ke dirandau pengarang berita sehari tu tadi.

"Berindik ari eksiden nya, Paul diripotka balat bakal enggau dianjung ke Sepital Besai Sarawak (HUS) ngena van ambulan," ku iya.

Taja pia, Paul diripotka ngapuska seput kepenudi urung jam 4.40 petang lebuh iya benung diperubat ba sepital nya.

Tang indu ke deriba kerita diripotka selamat tauka nadai nenama.

Kes nya agi dipansik ari baruh Seksyen 41(1) Akta Pengangkutan Jalan 1987.