Siku lelaki ditemu parai melepu
Cari Berita

Advertisement

Siku lelaki ditemu parai melepu

Staf @beritaibanMY
July 23, 2019

KASIH AMAT: Pendiau lelaki nya lebuh ditemu genturung pendiau ba palan penusah ke nyadi.

KOTA SAMARAHAN: Bangkai siku lelaki ditemu melepu di Sungai Kampung Jemukan Ulu, Asajaya, ditu, lemai kemari.

Nitihka penerang ke diterima @beritaibanMY, bangkai lelaki nya ditemu genturung pendiau dia enggau pengudah nya sida iya lalu ngaga ripot ngagai polis.

Nangkan ke nya, seraban polis ari Balai Polis Asajaya datai ngesah ke palan penusah ke nyadi enggau mai bangkai lelaki niki ke pantai.

Seraban Bomba enggau Penyelamat Malaysia (JBPM) Sarawak mega bisi datai enggau mantu bejalaika operasyen ba palan penusah ke nyadi.

Naka ke diatu, raban polis apin meri penerang ti silik bekait enggau kes tauka penusah ke nyadi tu.

Tu kes kali kedua ti dirikodka nyadi di Kota Samarahan ba bulan tu pengudah kes lelaki ukai peranak menua Malaysia (warga asing) ditemu parai ba dalam parit enda jauh ari Institut Penyelidikan Tanah Gambut (TROPI) kena 15 Julai tu tadi.

Ketuai Polis Pampang Samarahan, DSP Lee Chong Chern madahka dokumen pengelala lelaki ke parai nya udah temu enggau lelaki nya dikelala ngena nama Suhaidi Along berusia 41 taun, orang ari Kampung Jemukan.

“Bangkai lelaki nya ditemu urung jam 6.15 lemai kemari, enda jauh ari Sekolah Kebangsaan Jemukan.

“Asil peresa tumu, bisi abi telih ba sepiak kiba pala lelaki nya enggau iya deka dibuntas tasat sehari tu,” ku iya.

Bangkai lelaki nha udah dianjung ke Sepital Besai Sarawak (HUS) kena bejalaika pengawa silik agi.

Naka kediatu, kes tu ditukuka nyadi parai ngenyit.