Siku lelaki lenyau, kren labuh ke ai Batang Rajang
Cari Berita

Advertisement


Siku lelaki lenyau, kren labuh ke ai Batang Rajang

Staf @beritaibanMY
July 29, 2019

Raban APM benung bejalaika operasyen SAR ba palan penusah ke nyadi.

KAPIT: Siku lelaki diripotka lenyau pengudah kren ke ditepan iya labuh ke dalam ai Batang Rajang, lemai kemari (Hari Minggu).

Kepala Polis Pampang Kapit, DSP Freddy Bian madah, lelaki ke lenyau nya dikelala ngena nama Kiing Sih Hock, 59 taun.

Penusah nyadi dipechayaka urung jam 5.40 lemai ba jelatung ti diempu kompeni kayu balak di Nanga Amang, Kapit.

"Jam 6.50 lemai kemari, raban polis di Balai Polis Kapit bisi nerima ripot bekaul enggau kren ti dikena ngatung kayu balak udah labuh ke dalam ai Batang Rajang lebuh bejalaika pengawa ngatung kayu ke dalam tabut.

"Lebuh penusah nyadi, lelaki nya benung deriba kren nya enggau iya mega labuh ke dalam ai sungai nya. Nyentuk kediatu, lelaki nya apin temu," ku iya lebuh ke dirandau pengarang berita, sehari tu tadi.

Ku Freddy, Operasyen Ngiga enggau Nyelamat (SAR) lalu dipejalaika tekala nya pengudah ripot diterima.

Tang taja pia, operasyen SAR diketuka enda lama enggau belabuh baru urung jam 7 pagi tu tadi.

Operasyen SAR nya dipejalaika raban bomba ari Balai Bomba enggau Penyelamat Kapit enggau disaup Raban Nyaga Pengelikun Orang Mayuh Malaysia (APM) Kapit.