Tulang, kerubung pala mensia ditemu di Marudi
Cari Berita

Advertisement


Tulang, kerubung pala mensia ditemu di Marudi

Staf @beritaibanMY
July 24, 2019

APU: Graphik tulang enggau kerita ti bisi ditemu ba palan penusah ke nyadi.

MARUDI: Polis bisi tetemuka tulang enggau kerubung pala mensia, enda jauh ari sebuah kerita ke ditinggalka ba Kampung Narum ditu, sehari tu tadi.

Sapit Kepala Polis Pampang Marudi, ASP Jaimi Husin, madahka tulang enggau kerubung pala mensia nya ditemu lebuh raban polis ari Balai Polis Marudi bejalaika pengawa ngemata (Rondaan Cegah Jenayah).

Urung jam 11 pagi, sida iya bisi nerima ripot bekaul enggau tulang enggau kerubung pala nya.

Nangkan ke nya, raban polis lalu datai ngesah ke palan penusah ke nyadi.

"Lebuh datai ba palan nya, raban polis tetemuka sebuah kerita. Asil pansik ba palan penusah ke nyadi, dia sida iya tetemuka tulang enggau kerubung pala mensia, urung penyauh dua meter ari kerita nya," ku iya.

Ku Jaimi, sida iya mega bisi tetemuka sepasang selipar chura chelum.

Ku iya, raban polis diatu agi mansik tulang enggau kerubung pala mensia nya ngambika ulih nemu sapa ke ngempu tulang nya tauka kes tu bisi bekait enggau kes orang ti diripotka lenyau di Miri, bulan nyin tadi.

"Pansik silik deka dipejalaika ngambika ulih nemu kes tu bisi bekait enggau jes jenayah tauka nadai," ku iya.

"Tulang enggau kerubung pala mensia tu ditemu umbas iya ga penyauh ari rumah orang ti bisi ba palan tu. Nya alai, tulang enggau kerubung pala mensia tu tusah deka temu," tandu iya.