Anang enda bejaga-jaga bala apai indai
Cari Berita

Advertisement

Anang enda bejaga-jaga bala apai indai

Chief Editor | Berita Iban MY
August 29, 2019

KASIH AMAT: Asha ngenatka pemedis lebuh ditan lutur ba sepital pengelama empat hari.

RUANG BILIK: "Aku deka bekunsika utai ti kala nyadi ba pengidup aku enggau ari nya mega ngasuh aku ngeleda tauka nemu pengudah penusah ke enda disadang nyadi ba anak aku empu, ku apai orang nulis ba status Facebook iya.

Apai orang nya dikelala ngena nama Salahuddin Haris Yoganathan, 38 taun, nulis artikel bekaul enggau penusah ti udah nyadi ba anak tuai iya ,Asha Azaleah Natasha Nathan, 6 taun, diripotka napi penyadi pedis perut (food poisoning) enggau ngejungka anak iya nya ditan lutur ba sepital pengelama empat hari.

Salahuddin mega bisi mantaika graphik ayam ke bisi ruti anak mit (fast food) ti enda dikemendarka ari Opis Pengerai Malaysia (KKM) enggau irauka ayam anak mit nya dijual peneka ati aja ba kedai tauka pasar.





Salahuddin, madahka ruti anak mit ke ba dalam kutak nya bisi isi coklat, ruti kulum enggau ayam dibeli iya ba sebuah kedai semak enggau rumah iya Taman Sri Gombak, Hari Lima minggu nyin tadi.

Ku iya, sebedau penusah nyadi, iya meli ruti anak mit nya laban kasih meda bala anak iya ka ngulihka ayam ti bisi ba dalam nya.

"Tang, aku enda nyangka penusah nyadi hari ke sama, anak aku Asha mutah enggau pedis perut lalu ngejungka iya chirit pengudah makai ruti anaki mit nya.

"Ketegal irauka pengerai anak iya, Salahuddin enggau bini iya, Siti Julaikah Podo, 38 taun, lalu berumban nganjung anak iya Asha ke Sepital Kuala Lumpur (HKL) ngambika ulih diperubatka enggau silik agi.

"Lutur meri anak aku ubat ngambika jampat suman tang enda memukai nyau ngasuh anak iya raya agi.

"Anak aku urung penyampau 20 kali udah mutah, udah makai pengudah sida iya datai di rumah.

"Meda nyau majak raya, aku nganjung anak aku nya ke sepital nya baru enggau pengujung iya, anak aku nya ditan ba wad anak mit sebedau iya diasuh pulai tengah hari kemari, ku iya lebuh ke dirandau pengarang berita, kemari.

Laban ke deka nemu ari pun penusah nyadi, Salahuddin pan mansang baru ngagai kedai ke endur iya meli ruti anak mit nya ngambika ulih nemu enggau silik agi bekait enggau ruti anak mit nya.




Maya nya mega, Salahuddin lalu macha penerang ke bisi ba kutak nya enggau iya bisi meda bisi chap (logo) halal, tang nadai pemendar ari KKM enggau ruti (produk) nya ngena graphik kartun enggau animasi tebilang tang enda temu sapa ke ngaga nya.

"Lebuh aku ba kedai nya, aku nanya orang ke nyual ruti nya. Aku tekenyit pengudah iya madahka aku, iya enda ingat madahka aku ruti ke ba dalam kutak nya enda tau diempa.

"Enti nitihka ati aku sigi amat aku anu orang ke nyual ruti nya, tang aku agi ulih besabar enggau aku ngasuh iya badu nyual ruti nya agi.

"Aku bisi nanya bala orang ke sama diau semak dia ba group WhatsApp enggau kenu ku sida, ruti anak mit nya mega bisi dijual ba semak sekula," ku iya.

Ku Salahuddin, iya mega udah ngaga ripot polis bekaul enggau pekara nya di Balai Polis Gombak enggau ngaga ripot ngagai Opis Menteri Pengerai Malaysia (KKM) ngambika sida iya ulih mansik ruti anak mit nya.

Ku iya, KKM udah malas ripot ke digaga iya enggau raban KKM bejalaika pengawa mansik bekaul enggau ripot ke digaga iya nya.

"Aku ngarapka raban opis ti bekuasa ulih mansik enggau mutarka pekara tu enggau naka pengelengkas ngambika nadai agi anembiak mit ke bukai napi pemedis ke sama tauka sebaka nasit enggau anak aku.

"Nuju semua bala apai indai, ngarapka pekara tauka penusah ke ditapi aki tu ulih nyadi teladan tauka chunto ngambika kita rat agi bejaga-jaga tauka nyikap diri," ku iya.