Iya merap, nyium, murus tusu aku..
Cari Berita

Advertisement

Iya merap, nyium, murus tusu aku..

Chief Editor | Berita Iban MY
August 22, 2019

GRAPHIK PENGIAS: Siku indu ngelalaika mua ari kena penyati tauka jamah siku lelaki.

SIBU: Siku lelaki, 31 taun, ditan polis pengudah dipechayaka nguji masung indu misi (bakih ke sama kereja enggau iya).

Kepala Polis Daerah Sibu, ACP Stanley Jonathan Ringgit, madahka kena 17 Ogos tu tadi, lelaki nya, derisa (saspek) datai ke rumah indu misi, 24 taun, laban iya deka nyual kerita sebedau nitihka laki iya kereja di Kuala Lumpur.

Nitihka penerang ke diterima ari indu misi nya (mansa), lelaki nya ngejuka indu misi ke katil, lalu merap belakang sereta nyium enggau murus tusu indu misi nya.

"Nangkan ke nya, indu misi nya nguji ngelarika diri lalu tama ke dalam bilik enggau ngunchi pintu tang tejanggal.

"Lelaki nya nguji muka baju indu misi nya tang enda ulih pengudah ninga serabana enggau indu misi minta kasih ngambika lelaki nya enda ngereja ulah ti enda menuku nya," ku iya lebuh ke dirandau pengarang berita, kemari.

Ku Stanley, Sebedau tu, indu misi nya agi kekadang ati deka ngaga ripot polis laban iya irau tauka kasih ke lelaki nya ti udah bisi bini enggau siku anak  ti agi mit. Indu misi nya mega pan sama bela udah bisi anak.

"Tang taja pia, lelaki nya agi ga ka ngachau enggau majak ngemba indu misi nya.

"Meda lelaki nya majak deka ngachau iya enggau irauka pengelikun diri, indu misi nya pan mutus ati enggau ngaga ripot polis ensana (20 Ogos)," ku iya.

Kes nya agi dipansik ari baruh Seksyen 354 Kanun Keseksaan.