Nama tuju mansutka utai bakatu? Anang ngemaluka bansa diri...
Cari Berita

Advertisement

Nama tuju mansutka utai bakatu? Anang ngemaluka bansa diri...

Chief Editor | Berita Iban MY
August 20, 2019

KASIH TUDAH TUAI: Graphik siku inek tuai benung mabuk enggau gegaring tinduk ngetatka pala ti agi sebening dipansutka siti pages (orang iban).

Bisi maya kitai betundi tauka begagai, tang ukai semua utai tauka pekara ulih dibaie begagai tauka betundi laban semua ke digaga kitai meseti bisi taka tauka limit.

Admin seharitu tadi bisi meda enggau macha siti graphik ke dipansutka facebook pages (Semina Page).

Graphik nya mantaika siku indu tuai (inek) benung ngaga jari 'good' enggau graphik sebengkah agi, iya benung gegaring ngenatka pala ti pedis laban ke udah mabuk.

Ba graphik ke sama, admin pages nya bisi nulis "Maya ngirup, dik tekena ka cung enda nemu nipu nyadung ai".

Naka ke seharitu tadi, graphik inek nya chapuh 'viral' ba media sosial.

Urung penyampau seribu lebih iku orang ti udah besadungka graphik inek nya enggau semak seribu iku orang ti udah komen.

Tang taja pia, mayuh orang ti udah macha enggau meda graphik nya enda sepenemu enggau orang ke ngempu pages nya laban graphik nya dipechayaka ngemaruh tauka ngelesay ke inek nya enggau bansa iban.

Raban kami mega bisi 'screenshots' sekeda ari komen bala ti bisi komen ba graphik nya:

Kasih iya.. Sapa enda empu indai, empu inek tu?

Nama tuju mantai utai bakatu?.
Ukai utai jenaka tauka ngerangkai ngeli tu..

Nuju admin, ulihka madam 'post' tu?

Nadai tuju utai bakatu peda aku..

Mali ngaga orang tuai baka nya..

Nadai ngasuh ketawa utai bakatu..

Nya kebuah bansa kitai selalu dikemaruhka orang jeman diatu..

Uji graphik indai tauka inek nuan digaga orang bakanya. Keni asai nuan?


Asil pansik @beritaibanMY, mayuh bala meri komen ngasuh admin tauka orang ke ngempu pages nya madamka graphik nya tang nyentukka sehari tu tadi graphik nya agi bisi tauka enda dikeibuhka admin pages nya.

Raban kami melebaka admin pages nya enggai muai tauka madamka graphik nya laban bisi 3 kebuah aja:

1. Admin pages nya deka ngena graphik nya ngelakuka pages sida iya laban mayuh orang udah nyadung graphik nya enggau meri komen ba graphik ke sama.

2. Rindu meda bansa kitai iban mantaika penadak ba media sosial enggau ngambika bansa bukai nemu bansa kitai bagas ngirup!

3. Admin pages nya nganti bala ke sepintu bilik enggau inek nya meri sida iya surat saman malu.

Raban kami sigi enda nyukung tauka nyaup pekara ti bakatu.

Kami bisi meh pages tauka media sosial tang semua utai ke digagaka bisi tatak tauka limit.

Nya alai, sebedau nuan ngemansutka artikel tauka graphik. Nuan patut berunding enggau manah dulu.. Nama tuju nuan mantaika artikel tauka graphik nya?. Tauka enti nyema utai nya nyadi ba bala nuan empu, kati asai nuan?. Patut ke enda mansutka pekara baka nya?. Nama utai ti tau nyadi pengudah nuan mansutka artikel tauka graphik nya. Bisi meri penguntung ngagai bala pemacha?. 

Enti nyema kita deka ngelakuka pages tauka media sosial, mayuh macham chara kebukai ti ulih dikena kitai.

Anang kelalu ngayah tauka ngelesayka inek tuai baka nya. Uji ngaga artikel tauka chara bukai kena ngelakuka pages.

Tenako-nako! Ngarapka barang sapa ke sepintu bilik enggau inek nya mai pekara nya ngagai kort, ngambika orang ke ngempu pages ensepi asai tauka nama reti malu tauka ngemaruhka bansa diri! 😡